18/2026-2027

Dated April 2nd, 2026: Parliament budget session neih mek ah vawiin khan Rajya Sabha MP Pu K.Vanlalvena chuan Bangladesh nena insumdawn tawnna tura kum sawm kal ta a inremna siam tawh tun thlenga hma lakna awm mumal lo leh Kawrpui lei dawh thuai a tul thu a sawi chhuak.

Pu K. Vanlavena chuan Union Home Ministry bul tumin  Khawthlang Tuipui chungah cheng vaibelchhe 54 senna tur lei(bridge) dawh tan a ni ta chu lawmawm a tih thu a sawi a. Kum 2021 ah Bangladesh ramri hrula BSF camp engemawzat a tlawh thu te, BSF camp thenkhat chu eng kawng mahin a pawh loh thu leh henglai hmuna damlo te pawh inkalpawhna kawng a awm loh avanga an boral phah thu te BSF hotute leh khawtlang hotu ten a hnena an lo thlen thu te a sawi chhuak. He harsatna sutkian a nih theih nan hian Union Home Ministry ah Khawthlang Tuipui chungah lei dawh tura ngenna a thlen thu leh a ngenna ngaipawimawha Khawthlang Tuipui lei dawh tan a nih tak avanga Union Home Minister Pu Amit Shah chunga a lawm thu a sawi bawk a. He Khawthlang Tuipui chunga lei dawh hi sipai te tana a tangkai tur thu te, ramri bula cheng mipui te tana a tangkai tur thu te sawiin Sawrkar laipui hian ram hnufualte pawh a ngaihthah lo tih hei hian a tih lan thu a sawi bawk.