Covid-19 hrileng zel tur venna kawnga Sawrkar laipui thupeka  Zokhawthara Indo-Myanmar inkalpawhna leidawh March Ni 21,2020 a khar anih vanga India khua leh tui Myanmar  lama tangkhangte chu sawrkar hmalaknain Mizoram lamah lakluh an ni. Medical Screening Team, Zokhawthara Duty mek te’n uluk taka an hriselna an enfiah hnuah Champhai district chhunga Quarantine  Centre tura ruat 3 zinga pahnih Zokhawthar Land Custom Station leh District Panchayat Resources Centre (DPRC), Keifangtlang-ah te him taka dah luh an ni.

Mizoram lama hruai luh takte hi an vaiin mi 28 a ni a, heng zinga   mi pahnihte chu March Ni 28, 2020 Inrinni zan khan lakluh hmasak an ni a, a bak 26 dangte hi   March Ni 29,2020  (Pathianni) zanah lakluh an ni ve leh a ni. Lakluh takte zinga mi 25 te chu District Panchayat Resource Centre (DPRC) Keifangtlang-ah dah luh niin, 3 dangte chu Zokhawthar Land Custom Station-ah dah luh an ni. Tihian tun dinhmunah   Champhai district chhunga Sawrkarin Quarantine Centre atana a ruat 3 ah mi 34 an awm mek a. DPRC Keifangtlang-ah mi 30 (Mipa 12, Hmeichhia 18) an awm mek a, Zokhawthar Land Custom Centre-ah mi 4 (Mipa 2, Hmeichhia 2) awm mek bawkin, Tlangsam Polytechnic Building-ah erawh tun dinhmunah dah luh an la awm rih lo a ni. March Ni 28, 2020 (Inrinni)  khan heng khualzin tangkhangte hi Myanmar sawrkar chuan anmahni lam Gate hawngin an rawn chhuah phei tira, India ram lam Gate a inkhar vek avangin Leiah  hian an khawsa chhunzawm ta a ni. An harsatnate hriain Champhai district thuneitu te’n   State sawrkarah an thlen a, State sawrkar   ruahmannain  Sawrkar laipuia Ministry of Home Affairs lamah dilna thlen a ni a, phalna hmuh anih hnuah  lak luh an ni thei ta a ni. 

Zokhawthar Leia an  tan chhung hian  district  thuneitute leh  Zokhawthar  Village Level Task Force-te hmalaknain an mamawh eitur leh riahna turte ngaihvena chhawmdawl an ni. Tun dinhmunah hian Champhai District-ah in lama inkhung hrang home quarantine mek mi 434, Sawrkarin Quarantine Centre atana a  ruat pathum zinga pahnihah  mi 34  awm mekin, Isolation Centre-a dah an la awm lo a ni.  Champhai district pumah Medical Screening mi 1131 tan neih a ni tawh bawk.