Vawiin khan Food, Civil Supplies & Consumer Affairs Minister Pu K Lalrinliana chuan District Hospital Kolasib a hman tur Personal Protection Equipment 150, N95 mask 150, shoe cover 150, Three layer mask 400 leh Covid-19 chungchanga hriattur inziahna leaflet thahnem tak Dr Robert Lalfakzuala, District Medical Superintendent hnen ah a hlan. Minister hian Covid-19 hri darh zel tur veng a duty te tlawh kualin, Kolasib Assembly Constituency chhung a Village Level Task Force 17 te hnen ah a tul apiang a hman tur Cheng Singkhat theuh leh Hand Sanitizer engemaw zah a pe nghal bawk a ni.

Pu K Lalrinliana chuan Mizoram mipuite eitur mamawh chawk luh kawngah Kolasib district chuan mawhphurna sang tak an neih thu sawiin Covid-19 hri darh zel avang a Lockdown kan hmachhawn mek ah hian tlawmngaih chhuah tak meuh a thawhho a tul zia a sawi a. Eng chen nge he natna avanga kan buai dawn tih hriat lawk theih a nih loh avangin mitinte inremchem nachang hre turin a ngen a, he hun harsa kan tawh chhung hian sawrkar leh mipui kan tan tlan a pawimawh thu sawiin eirawngbawlna Gas te pawh ren tak a kan hman thiam a tul thu a sawi bawk a ni. Covid 19 vang a FCI labour tam zawk an haw avangin Railwagon hmang a buhfai lo lut te chu Mizoram chhung a inhlanchhawn zung zung a nih theih nan Bairabi Labour Association te thahnemngai tak a, a tul apiang a thawkchhuak tur in a chah a, harsatna awm ang te pawh sutkian zel a tum thu a sawi bawk a ni. FCI buhfai thiarna labour rate Cheng 1.36 a thawktu duh ang zat hmuh a nih loh avangin Minister chuan a mimal sum atangin bag tin ah Cheng 2 zel a pek belh mek bawk a ni. 

Minister hian Bairabi Rail Station a Labour Association Office tlawhin, hun harsa tak kar a buhfai thiar thintute chungah lawmthu a sawi a, harsatna an thlen ang te chu a ngaihtuahpui tur thu sawiin an hman tur Mask leh Hand Sanitizer a pe nghal bawk a ni. Bairabi FCI a thawktute kawmin, tunah hian buhfai wagon 42 awm mekin wagon 29 lo thleng leh mai tur a awm thu an sawi a. Labour ten buhfai hi Wagon atang a Truck a an hlanchhawn zung zung loh chuan, darkar 7 a pelh atang a darkar tin Wagon pakhat zelah Cheng 150 an chawi a ngaih thin thu an thlen a. Hemi avang hian buhfai lo thleng tur te thiar tur hian motor 300 vel a ngaih dawn thu an thlen bawk a ni. Minister chuan heng buhfai te hi a rang thei ang ber a thiar zung zung a nih theih nan Truck Owner Association te, Driver te leh mimal truck nei zawng zawng te pawh Mizoram mipui ten harsatna kan tawh loh nan a thei apiang thawhchhuah a tul thu a sawi. 

Supply Minister hian Bairabi Primary Health Centre a a tul ang a hman tur PPE, Mask leh Sanitizer a hlan nghal bawk a ni.

Bairabi North VC house a Village Level task Force hrang hrang te a kawmna ah hian Pu R Lalfakawma, Chairman, Bairabi North Village Level Task Force Committee chuan a tul a nih chuan Bairabi thalai te chu Buhfai thiar tur a thawhchhuah an inpeih reng thu a sawi bawk a ni.

Kolasib DC Dr H Lalthlangliana pawhin thu sawiin mipui nitin mamawh chawk luh zel a nih theih nan Sawrkar thuchhuak angin Essentially commodities phur lirthei te chu kawng lak a khaihlak miah lova tlang tir zung zung a tul thu a sawi a, hemi kawng ah hian puih an ngaihna apiang ah Village Level Task Force te chu inring reng turin a nghen nghal a, mipui mamawh zual indawr tawnna a awm theih nan Kolasib district huam chhung a bank hrang hrang hawn dan tur ruahmanna siam a nih tur thu a sawi bawk a ni.