Tunlaia China leh khawvel ram dangte ngaihven hlawh tak Novel Coronavirus (2019-nCoV) natna leng mek laka lo invenlawkna turin India leh Myanmar ramri depa awm, Zokhawthar, Champhai District-ah vawiin atang khan Mizoram sawrkar chuan Medical Screening Team duty tur a dah a, ramri kaltlanga veivak leh khualzinte endik hna an kalpui tan a ni.

Endik hna hi Mizoram sawrkara Health & Family Welfare Department-a thawktu Doctor Dr Samuel Laldinthara, MO, IDSP, Dr Joel Lairemsanga, MO, MMU leh Staff-te’n ramri depa screening hi kalpui tanin, khualzinte chinchang leh awmdante zawtin an Medical Check up an nei a. Vawiin Screening neih tanna hi Pu Benjamin Zalawma Ralte, SDC leh Dr. Lallawmkima, DIPRO ten an telpui a ni. Tun dinhmunah engmah hlauhthawn tur a awm lo a, mipuite thu thang diklo leh belhchian dawl lo te thehdarh lo tur leh awih lo turin sawrkar chuan a ngen a ni.

Myanmar Sawrkar pawhin January Ni 27, 2020 atang khan an mahni lam ramri dep Khawmawiah Medical Screening hi kalpui tan tawh bawkin tun thlengin rinhlelh engmah hmuh an nei lo a ni.