Vawiin khan District Education Committee (DEC), Samagra Shiksha, Lawngtlai District chu Lawngtlai DC Conference Hall-ah Addl DC Pu K. Laltlawmlova, MCS hovin an thu khawm.

He DEC meeting-ah hian agenda 9 (pakua) ngaihtuah niin, Samagra Shiksha hnuaia intervention hrang hranga hma lakna thlir ho a ni a. Major intervention changtu Assistant Programme Officer (APO)-te'n anmahni chan theuh intervention-a hma sawn dan (achievement) report an pe bawk.

Lawngtlai District-ah hian sawrkar primary school 226, middle school 155, high school 35 leh higher secondary school 2 a awm a. Lawngtlai DC kaihhruaina hnuaiah "Kan Sikul, Kan Huan" project kalpui niin, Samagra Shiksha hnuaia sikulte'n an ti tha tlangpui a, kumin Republic Day pawh khan "Kan Sikul, Kan Huan" project-a hma la tha sikul paruk te chu lawmman pek an ni.

Total Literacy Drive hnuaia hma lakna atangin ziak leh chhiar thiam lote hnenah a bika zirtirna pek niin, animator-te'n tunah hian evaluation an nei mek a. NISHTHA (National Initiative for School Heads and Teachers Holistic Advancement) hnuaiah nikum (2019) December ni 2 atanga ni 20 chhung khan zirtirtu 345 training-tir tawh an ni a. Tunah hian DIET Lawngtlaiah NISHTHA training hi kalpui leh mek niin, in-service teachers training hnuaiah pawh hma lak mek a ni bawk.