Kum 1971 Indo-Pakistan indona a India-in hnehna a chan ni champha phak, kum tina December 16 a hman thin Vijay Diwas chu tukin zing karah khan War Memorial, Treasury Square, Aizawl ah hman a ni a. December 16, 1971 ah khan East Pakistan Sipai 93,000 hotulu ber Lt.Gen Amir Abdullah Khan Niazi leh Lt.Gen Jagit Singh Arora, allied forces hotupa ber chuan India in hnehna a chang tih lantir in Indo-Pak War 1971 tihtawpna thutlung an ziak a ni.

He hunah hian Mizoram Governor Lt.Gen (Rtd) Nirbhay Sharma, PVSM, UYSM, AVSM, VSM Kum 1971 Indo-Pakistan War Veteran ni bawk chuan ram tana martar te zahna pangpar a dah hmasa ber a. Chief Minister Pu Lal Thanhawla; Lt.Col. Z.S.Zuala, Parliamentary Secretary; Chief Secretary Pu Lalmalsawma; Pu Thianghlima Pachuau, Director General of Police, Mizoram; Maj.Gen. M.V. Chandran, IGAR; Wg. Cdr. (Retd) Lalzawma, Principal Consultant, Civil Aviation Wing, Armed forces chi hrang hrang hotu te, Ex-Services welfare hruaitute leh mi pawimawh te’n martar te zahna lantir nan War Memorial ah hian pangpar an hlan a ni. India hnehna chan lawman pual programme chhunzawmna, Vijay Diwas cum Re-Union pawh vawiin chawhma in 39 Assam Riffles Hall ah hman chhunzawm nghal a ni. He hunah hian Mizoram Governor Lt.Gen (Rtd) Nirbhay Sharma chu khuallian ah hman a ni.

December 11, 1971 a Parachute hmanga Dhaka khawpui hnaih a tum thla, Pakistan tlawmna ni December 16, 1971 a Dhaka khawpui lut hmasaber Batallion a tel, Mizoram Governor Lt. Gen(Rtd) Nirbhay Sharma chuan Vijay Diwas chu India sipai te tan chauhva hnehna ni ni lovin thatna in nunrawnna a hnehna ni a ti a. He hnehna a thawhhlawk ber, tangrual pawl puih tlattu Bangladesh mipui te, India Sipai in a thawhpui Mukti Bahini te leh he indonna a Mizo sipai martar te zawng zawng zahna chibai a buk tih a sawi a. Indonna ah chuan Sipai ten chakna an neih theihnan mipui thlawpna a pawimawh ber a ti. Mizo pasaltha ram leh hnam chhan nana martar te chuan zah an phu a, hnam ti zahawm tu a ni a ti a. “Indopui I-na ah khan Mizo pasaltha 2000 chuangin ral an lo bei tawh a, chung zinga pasaltha 78 laiin nunna a chan a. Indopui 2-na a lo awm pawh khan Mizo pasaltha tam tak chu indona ah an tel a, Kargil War, Terrorists beihna bakah remna tih chhiat tum tute beihna hmun a piang a, sipai huaisen zingah Mizo hming lam rik a ni thin a, kan Mizo pasalthate thisen a chhuak ziah a. Hei hi Mizo te tana inchhuanna tham, hnam huaisen zia rang a ni a, ka chhuang khawp mai che u”, a ti a ni. India ram a him zel nana, ram venhimna ah Mizo thalai tam zawk te an luh theih nan te, Mizo thalai tam zawk ten Hindi tawng an thiam theih nan Ex-Services mi leh sa te chu tan la zel turin a chah a, puih an ngai a nih pawn a theih tawp a lo chhuah pui zel tur thu a hrilh a ni.

Vijay Diwas cum Re-Union programme ah hian Ex-services mi leh sa, war veteran te, sipai thihsan hmeithai leh Sipai hotu lian te an kalkhawm tha hle a. Armed Forces welfare chungchang leh hmalakdan tur te thusawi tura sawm bik ten an sawi a. Thusawitu zingah hian Lt.Col(Rtd) Z.S. Zuala, Parliamentary Secretary, Maj Gen. M.V. Chandran,IGAR(E), Col(Rtd) John Zama, President, Mizoram Ex-Services Leaque HQ, Prof Capt Lalkima leh Surg Lt Cdr Lalnuntluanga, Director Sainik Welfare & Resettlement te pawh an tel a . He hunah hian Indona hmuna sipai thi nupui te hnenah thilpek hlan a ni. Sainik Welfare report in a tarlan danin kumtin Sipai lak runpui tum hnih neih a ni thin a, kum 2015 - 2016 chhungin Mizo tlangvalte - Army ah mi 68, Navy ah mi 01 an vaiin Mizo tlangval 69 an lut a ni. Nakum January thla khian Mualpuiah sipai lak runpui a awm leh dawn bawk a ni.