Home Minister Pu R.Lalzirliana’n Saitual kum 100 tlin lawmna programme chu vawiin nileng khan Saitual Public Playground ah a hmanpui.

Khuallian Pu R.Lalzirliana chuan Lal Dorawta din Saitual khua chu a din tirh atang rengin Kristiante chen nana din, khatih hunlaia tihduhdah tuar Kristiante thlamuang taka an chen theihna tura din a ni, tiin Krista rilru pua midangte tana malsawmna nih tum turin Saitual mipuite a chah. He khua atang hian thu leh hla lama mi hrat khawkheng te an lo chhuak tawh a, chung zingah chuan Mizo novelist hmasa ber L.Biakliana te, hlaphuahthiam Vanmawia leh Zumi te an tel a. Chu mai bakah lehkhathiam IAS leh IFS hialte, sawrkara mi pawimawh tak tak he khua atang hian an lo chhuak tawh thin tiin Minister chuan tunlai thangtharte hian an ni hnen atang hian zir tur tam tak kan nei a ni, a ti a. Saitual thalaite zingah lehkhathiam lamah te, infiamna lamah te, Mizoram leh India ram pum huap pawha lang pha engzat nge chhuak ang tih an ngaihtuah thar a tul hle a ni, a ti.

Pu R.Lalzirliana chuan Mizoram laili lai taka awm Saitual chu Mizo nun zemawi vawng nung leh chawi lar turin an pawimawh hle a, ram dang mite tihdan kan lak nasat chuan kan hnam nunzia a ral thei tih hriain Mizo nunphunga a tha laite chhawm nung leh kengkawh sauh sauh turin Saitual mipuite an pawimawh hle a ni, a ti a. Home Minister Pu R.Lalzirliana chuan HIV/AIDS chungchang pawh sawi langin tunlai Mizo thalai run mektu a nih thu leh a kaitu tam ber chu nun khawloh vang a kai an ni, a ti a. He natna hlauhawm tak do let tur hian nun fimkhur a ngai a, Pathian duhzawnga kan nun kan tihthianghlim a ngai a ni, tiin a vei mekte erawh thinhrik mai lova, natna khirh dang vei te kan khawngaih ang bawkin lainatna leh ngilneihna tela kan enkawl a ngai a ni, a ti.

NECS Managing Director Pu Robert Romawia Royte pawhin Saitual khawpui chu Mizoram khawpui pawimawh berte zinga mi ni turin a invawrhchho mek nia a hriat thu a sawi a. An khaw ropuina chhawm nung zel tura mipuite chahin zirlai ni mekte tan pawh an taimak a thahnem an ngaih phawt chuan an hmakhua a eng hle tih hria a tan la sauh sauh turin a fuih.

Saitual khaw kum 100 tlin lawmna hi kum bul atang khan hman tan a ni tawh a. Thla tin infiamna kawng hrang hrangah inelna neiin hla inphuahsiakte pawh nei a lo ni tawh a. A lawmna pui ber hi December 14, 2015 atang khan tanin hemi ni hian Centenary mei det a ni a. December ni 15 khan MUP kaihhruaiin mi 500 chuangin Centenary dar an vua a, Prof. Laltluangliana Khiangte chuan Lal Muala Centenary lungphun a hawng. Saitual Centenary lawmna inkhawm hi Mizoram Chief Minister Pu Lal Thanhawla’n Zirtawpni ah a khar dawn a ni.

Saitual khua hi kum 1915-ah Lal Dorawta’n a din a. Hetih hun lai hian In 18 leh mi cheng 76 an awm a, kum 2015 ah chuan In 1280 awmin a mi chengte 7573 zet an tling ta. Kum 1962 khan Mizoram sawrkar chuan Block Development Office hawngin Saitual Pre Extension Block tih a ni a. Rambuai avangin Thingsul Tlangnuamah sawn thlak leh a ni. Hemi hnu hian Civil Sub-Division ah puan a ni leh a, Village Council lian tak pakhat hnuaia awm thin kha kum 2015 atang hian VC pathumah then a ni ta a ni.

Vawiin programme, Organising Committee Vice Chairman Pu Lalduhawma Sailo kaihhruaiah hian Cultural show leh Centenary Concert ropui taka neih a ni.