Rashtriya Madhyamik Shiksha Abhiyaan (RMSA) hnuaia March thla tawp lama Headmaster te leh Zirtirtu dang lak te tana Induction Training, hawnna programme vawiin khan College of Teacher Education (CTE) Seminar Hall-a a neih chu Education Minister Pu Lalsawta’n a hmanpui.

Pu Lalsawta chuan Zirtirtu thar te chu an awmna veng leh khua ah te entawntlak taka awm a tul thu sawiin an nun uluk a, zu leh sa, leh mipat-hmeichhiatna ah te fihhlim turin a chah a. Heng hmunah te hian veng leh khaw hotute leh tlawmngai pawl te ngai pawimawh turin a chah bawk. Zirtirtute chu engtik lai pawh a Zir bawk, Zirtir bawk ni a, naupangten an hriatthiam theih nan awlsam leh mawl zawka zirtir dan ngaihtuah thin turin a fuih a.

Minister hian Zirna siamthat chu hnam dinchhuah a ni tiin rual u leh hranghlui te an hlawhtlinna chhan leh mi entawntlak tak an nih na chhan chu zirna vang a nih thu a sawi. Tawng a zirna reng rengah a taka hman theih lai a pawimawh thusawiin Hindi zirna lamah pawh hetianga rilru put a tul thu a sawi. Induction Training chhung zirtirtute chu inpumpeka hotute thu ngaichanga thahnemngaihna rilru pu turin a chah bawk a ni.

Induction Training hawnna programme hi Pu S.Lalthanghuta Sailo, Addl. State Project Director, MEMS in a kaihruaia, CTE Principal Dr. Vanlalhruaii’n Induction Training kalhmang tur leh CTE kalphung chipchiar takin a tarlang bawk a ni.

Induction Training hi Headmaster 22, Mathematics teacher leh general teacher 43 ve ve ten kar hnih chhungin an neih dawn a. Training hi University lamah Education faculty leh Education lamah mithiam ten an pe dawn a ni.