Kumin March thlaa RMSA zirtirtu 161 lak thar te tan RMSA, School Education leh SCERT tangkawpin ‘Induction Training of H/S Teachers under RMSA’ buatsaih a ni a, he training 27th September - 20th October chhung awh tur chu vawiin khan Education Minister Pu Lalsawta’n SCERT Auditorium-ah a hawng.

SCERT Director Pi Malsawmthangi kaihhruai he training hawnna inkhawmah hian Education Minister chuan RMSA hnuaia a vawi khatna atan mumal taka training buatsaih a ni thei chu lawmawm a tih thu a sawi a. RMSA hnuaia zirtirtu lak zawng zawngte chu duhsakna emaw sawipuitu an neih vang ni lova, thiam leh tling nia ngaihte chauh lak an nih avangin “zirtirtu tha” nih bak chu bat an nei lo a ni, a ti. Zirtirtu tha ni tur chuan nitin an nunphungah te, hawihawmna, tawngkam leh incheina thleng pawh a invawng tura chahin Minister chuan zirtirtu chu “zir bawk, zirtir bawk” an nih tur thu leh inbuatsaihna tha tak nena tanlak a pawimawh a ni, a ti bawk. Pathianin zirtlak lo mihring hi a la siam lova, tunlai khawvelah phei chuan zirlaibu piah lama thil te pawh hmang tangkaia, naupang chak lo zawk te pawhin an zirlai an hriatthiamna tura hman thiam a tul hle a ni tiin a fuih bawk.

Vawiina training hawnnaah Keynote Address sawitu pahnih - Pu T. Rohmingliana, State Project Direcor, Mizoram Education Mission Society leh Pi Laldawngliani Chawngthu, Jt. Director, SCERT - te an awm a. Pu Rohmingliana chuan India sorkar-in hmasawnna atana ke pawimawh ber pakhata a ngaih ‘zirna’ chu Mizoramah pawh a siamthat hna thawh mek a ni, a ti a. RMSA hnuaia zirtirtu lak te chu “mission mode” a thawkin inpekna thinlung leh rawngbawlna ang hiala ngaia thawk tura beisei an ni, a ti bawk. Pi Laldawngliani chuan he training atana hriattur pawimawh hrang hrang a sawilang bakah rampumah zirna hawilam thil zawng zawng fuankhawmna ‘National Curriculum Framework’ chu he training chhungin zirtirtute hrilhhriat an nih tur thu leh ramchhunga zirna hi engtizawnga kalpui tum nge a nih tih an hriatchian chuan zirlaite kaihhruai dan pawh an thiam zawk ngei tura beisei an ni, a ti. Tunlai khawvelah technology tel lova zirtirna hi tangkai leh kim tawh lo hiala ngaih a ni tawh thu te, RMSA hnuaiah chuan zirlai naupang te chu an zirlai chauh ni lovin an hmalam huna an eizawnna kawng tur an thlanna tur thlenga rilru te siampui thiam thei tur khawpa zirtirtu tha nih a pawimawh tawh a ni, a ti bawk. Zirlai tam tak te chu rilru lama harsatna leh thanmawhbawk an neih thin avanga an rilru leh nunphung te kawng dik zawka hruai thiam thei tura zirtirtute inbuatsaih that leh entawntlak nih a ngai a, sorkar pawhin hei hi ngai pawimawhin rampumah kum 2006 atangin ‘Adolescence Education Programme’ a kalpui tan a ni tih a sawilang bawk. Mizoramah Continuous Comprehensive Education kalpui tan a nih hnuah zirlaiten an zirnaah phurna leh tuina thar nasa tak an nei phah tih hmuh zel a ni a, CCE hnuaiah hian zirtirtu 13,608 lai training pek tawh an nih thu a tarlang nghe nghe a ni.

RMSA hnuaiah hian kuminah zirtirtu - General teachers 92, English teachers 23, Science teachers 23 leh Maths teachers 23 - an vaiin 161 lak an ni a, teacher bakah Laboratory Attendant 222 lak an ni bawk. Heng zirtirtu lak thar te hi RMSA New School 23-ah post an ni. Vawiina training tan tak hi Batch 2-in kalpui a ni dawn a - 1st Batch chu 27th September - 6th october 2011 chhung hian Aizawl, Kolasib, Champhai leh Serchhip District-a RMSA Teachers te tan a ni ang a; 2nd Batch hi Lunglei, Lawngtlai, Saiha leh Mamit District-a RMSA Teachers tan 11th October - 20th October 2011 chhungin neih a ni thung dawn a ni.