Vawiin khan Secretariat Conference Hall-ah Pu H. Rohluna, Industries Minister leh Pu Joseph Lalhimpuia, Parliamentary Secretary, hovin Industries Department hnuaia Officer-ten kum thar atana intuaitharna leh Meeting pawimawh tak an nei. Secretariat lama Officer-te bakah Directorate leh District hrang hrang atanga Officer-te an tel tha hle.

Industries Department hnuaia thawktu Officer-te nen a inhmuhkhawm akhatin kum tirah hetiang hun tha tak an nei chu lawmawm a tih thu sawiin Pu H. Rohluna chuan thawktute lo thawh tawhnaah hlawhtlinna tamtak leh rahchhuah tha tak tak hmuh tur a awm laiin hmasawnna tur tamtak erawhchu a la awm a ni a ti a. Industries Department hi department lian leh senior tak, pawimawh leh thawhchhuah nei tha tak a nih avangin kum bul atang hian mahni theuh in en let a, rilru leh tih takzet a ram tan a hnathawh a tul a ni a ti a. Mipuiin Industries Department laka an beisei ang an nih phaklohna tam tak a awm ngei ang a; mahse, thawktuten tan lak nachang an hriat chuan ram hmasawnna kawngah sulsutu ber an ni thei in hun lo kal zel turah pawh ram tana mawhphurhna lian tak chu Department leh thawktute chungah hian a innghat tih hria a tan la thar zel turin a fuih a ni.

District Office leh hmanrua hlui tawhte thawmthat zel leh tih changtlun zel tum a nih thu Minister chuan sawiin, thawktute service chungchangah pawh lungrual taka tang tlangin siamthat angaihnaah siamthaa hmalak ho zel tha a tih thu leh tuna thawktu, Senior Officer-te an pension zel dawn a, chung hunte chu thlir lawk a, tun atanga nasa zawka tanlak a ngai a ni a ti bawk.

Pu Joseph Lalhimpuia, Paliamentary Secretary, pawhin thu sawiin Industries Department-a thawktu, a bikin Officer-te chu pension hma loh chuan Department neitu leh Sawkar kutke ni reng tur an nih avanga inthlahdah lova thawh a ngaih thu leh mahni hna ngaipawimawhlo leh mahni awmna tur a awm lo te, thawk tha duhlo te erawh chu sawkar tan hlawh pek reng a harsat tur thu a sawi a. Sawrkar hmalakna hrang hrang NLUP-ah te Industries atangin hmalakna a tamin Trade hrang hrang Puanthui khawl, Autorickshaw, Thingzaina khawl, etc., pek chhuah a ni a. Heng atang hian hlawhtlinna hlawk tak hmu thei tura NLUP dawngtute vil ngun a thawhpui thiam turin a chah bawk.

Mahni inthununna leh dan zawm chung changah khauh zawk a kal a tul thu sawiin, Parliamentary Secretary chuan Industries Department atangin tunah hian Scheme hrang hrang duan mek a ni a, Central Ministry-te dawrin project hrang hrangte siam a hmalak chhoh mek a ni a, hengah te hian file chak zawk a kal pui dan tur leh tanlak a ngaihna turte a sawiin hnathawhna leh hmalakna hrang hrangte chu a langtlangin file leh lehkha pawimawhte chu a thlen chin hrechiang zel tur leh mamawh huna zawhnate chhang thei turin a ngen nghal a ni.

Vawiin a Meeting hi Pu Zothankhuma, ITS, Secretary leh Director hna chelh bawk tuin a kaihhruaiah hian inkawmhona tha tak neih a ni a. District lam atanga Officer kal ten report leh an harsatnate an sawi nghal bawk a ni.