Vawiin hian Lawngtlai DC Conference Hall ah kan hma lawk Dt 14.1.2016 a Kuthnathawktute Ni lo thleng tur Lawngtlai District chhunga hman dan tur Bawrhsap Pu J. Hmingthanmawia hova rel a ni.

Pu J. Hmingthanmawia chuan, kan rama mipui tam zawkte hi kuthnathawka eizawng kan ni a, chuvang chuan sawrkar hian kuthnathawktute hi a ngai pawimawh hle a ni, an puala ni bik ruahmanna pawh hi kum 2011 atang khan uluk taka hman tan niin vawiin thlengin a la ngaipawimawh hle a ni, a ti. Tin, he ni hi sawrkar Flagship Programme NLUP nen a inhmeh em em a, chuvang chuan sawrkar hnathawkte pawhin he ni hi kan ngaipawimawh tur a ni, a ti.

Lawngtlaiah chuan he ni hi Central YLA Hall-ah hman a ni anga, Chawngteah chuan Art & Culture Auditorium ah hman tura ruahmanna siam a ni ang. Chawngteah hian Minister of State, Dr. BD Chakma chu khuallian ni tura beisei a ni a, Pu N.K Chakma, MLA chu khualzahawm a ni thung ang. Lawngtlaiah chuan Minister of State, Pu C. Ngunlianchunga chu khuallian ni tura beisei a ni a, Parliamentary Secretary Pu H. Zothangliana chu khualzahawm a ni thung ang.

He mi ni hian kuthnathawktute leh sawrkar Department hrang hranga thawktute inkawmhona (interaction) hun ruahman a ni dawn a, khawpui chhehvel a mite hnenah NLUP tanpuina a theih ang ang sem tuma ruahmanna kalpui mek a ni bawk. He Meeting ah hian tlawmngaipawl hruaitute, NLUP Line Department aiawhte, Chanchinbumite an tel a ni.