Commerce & Industries Department chuan vawiin khan District Indutries Centre, Kolasib-ah Serlui leh Kolasib cluster a NLUP 3rd & 4th Phase hnuaia Puanthui thlangtu mi 38 hnenah leh, NLUP 3rd Phase hnuaia Photo & Videography thlangtu mi 2 leh Desktop Publishing thlangtu mi 9 hnenah 2nd Installment an sem a, Pu Zoram Sangliana, Chairman, MIFCO chu khuallian niin NLUP tanpuina hi a semchhuak a ni.

Pu PC Zoram Sangliana chuan kuthnathawkte tanpui theihna tura sorkarin NLUP a kalpui chu lawmawm a tih thu sawiin, a hlawhtlin tak takna chu a dawngtu te taimakna leh inpeknaah a innghat a ni a ti a. Sorkarin mi taima leh thahnemngai te a tanpui zel dawn tih sawiin, hemi atan hian tang te tanpuina turin New Economic Development Policy (NEDP) a siam a, hemi atan hian Rs.25,000lacs dah anih thu a sawi a. Tanpuina dawngtu te thahnemngai taka hmala chhunzawm zel turin a chah a ni.

Puanthui thlangtu te hnenah hian khawl pathum :Ke khawl, Overlock machine, jenome sewing machine leh a pawisa faiin Rs.21,480/- (khawl leina bang Rs.16480/- leh electrification atan Rs.5,000/-) theuh sem a ni a, tanpuina pawisa fai sem chhuah zawng zawng hi Rs.816,240/- a ni. NLUP dawngtu te hi 3rd Phase-ah mi 27 leh 4th Phase-ah mi 11 an ni. NLUP sem bakah hian jenome sewing machine (embroidery machine) hmandan leh enkawl dan tur Company mithiamten beneficiary te hi an zirtir nghal a ni .

Photo & Videography leh Desktop Publishing tanpuina pek chhuah hi NLUP 3rd Phase niin, 4th Phase sem turin ruahmanna a kal mek a ni. Photo & Videography thlangtu mi 9 te hnenah hian Rs.50,000/- theuh sem a ni a, sum semchhuah zawng zawng hi Rs. 4,50,000/-. He pawisa hi Laser Photo Copier (Scanner Support) leina atana pek a ni. Desktop Publishing bik hi 3rd Phase 2nd & Final Installment niin, beneficiary pahnih hnenah Rs. 50,000/- ve ve a sem niin, Camera & Accessories lei nan Rs.45,000/- leh bul tanna atan Rs.5000/- pek an ni a, a vaia sum semchhuah zat hi Rs.1,00,000/- a ni.

Tun dinhmunah Kolasib District-ah Commerce & Industries Department hnuaia NLUP 3rd Phase hnuaia dawngtu mi 401 awmin Trade 23 a awm a, 4th Phase hnuaiah trade 24 kalpui niin dawngtu mi 178 an awm a ni.

Vawiin NLUP semna programme hi Pu Lalbiakzuala Aineh, Sub-Divisional Industries Officer, Kolasib in a kaihruai a, Nodal Officer, NLUP & Addl DC, Kolasib, Jt.Director, Industry Dept, DIPRO & Media Officer NLUP, Kolasib te’n an tawiawm a ni.