India leh Bangladesh sorkar inkara thawhhona tha zawk neih zel theih nan vawiin khan Assam khawpui Guwahati-ah ‘Indo-Bangladesh Stakeholders Meet’ neih tan a ni a. He meeting pawimawh takah hian Mizoram Chief Minister aiawhin Commerce & Industries Minister Dr.R.Lalthangliana a tel a; Commerce & Industries Secretary Pu P.Jawahar, IAS, leh Higher & Technical Jt. Director Pu Zodingliana ten Minister hi an tawiawm a ni.

Indo-Bangladesh Stakeholders Meet hi Assam sorkarin a thleng a; India leh Bangladesh atangin official pawimawh tak takte telin ram pahnih inkar, a bik takin India hmarchhak bialah hmalak mekte leh hmalak zel dan turte an sawiho a ni.  He ni 2 awh tur meeting-ah hian Union Minister of State, Ministry of Road Transport and Highways General (Retd) V.K. Singh; High Commissioner of India to Bangladesh Pi Riva Ganguly Das; Bangladesh Commerce Minister Pu Tipu Munshi; Adviser to the PM on Economic Affairs, Bangladesh Pu Mashiur Rahman; Assam Chief Minister Pu Sarbananda Sonowal, Assam Commerce Minsiter Pu Chandra Mohan Patowary; Tripura Chief Minister Pu Biplab Kumar Deb leh official pawimawh dang engemawzat an tel.

He meeting-ah hian Mizoram Commerce & Industries Minister Dr.R.Lalthangliana chuan  thusawiin India leh Bangladesh ram pahnih inthian that zelna tur leh an inkarah thawhhona tha zawk awm theihna turin a vawi khat nan ‘Stakeholders Meet’ neih theih a ni chu a lawmawmin a vanneihthlak hle a ni, a ti a. Mizoram mamawhte thlenin Dr.R.Lalthangliana chuan Mizoram chu Myanmar nen km.400 chuang leh Bangladesh nen km.300 chuang ramri intawm a nih avangin border trade changtlung tak awm theih hmalak chak a tul takzet a ni, a ti. Tuna Look East Policy hnuaia hmalak mek multi modal kawngpuiin a tlan tlangna tur hmunpui Zochachhuah tihchangtlun a pawimawh hle a; border trade chak zawka kalpui a nih theih nan ramria awm khaw pahnih Kawrpuichhuah leh Zokhawthar-ah te Integrated Checkpost (ICP) siam vat te, Tlabung-ah Border Trade Facilitation Centre din thuai te, Indo-Bangladesh ramria hmun 4 - Tuipuibari, Marpara, Silsury leh Duisury - ah te ‘Border Haat’ awm theih nana hmalak thuai a pawimawhziate Mizoram Industries Minister hian vawiin meeting-ah a tarlang a ni. Dr.R.Lalthangliana chuan India leh Bangladesh ram pahnih atangin official pawimawh he meeting chhim tura kalkhawmte chu Mizorama rawn zin a, a hmun ngeiah hmalak dan tur enho turin a sawm nghe nghe a ni.