Mizoram chuan Paragliding Accuracy World Cup 2020 and Grand Festival chu February ni 10 atanga February ni 16, 2020 hian Serchhipah a thleng dawn a. He World Cup thlen tur inbuatsaihna atana Organising Committee chu an Chairman Pu Robert Romawia Royte, Sports leh Tourism changtu Minister hovin a pisaah vawiin khan a vawikhatna atan an thukawm.

Pu Robert Romawia Royte chuan he World Cup kan thlen tur hi a phurawm tak zet a, Mizoramin infiamna lamah nasa taka hma a lak mek laiin khawvel pum huap inelna World Cup meuh thlen theihna tur remchang kan hmuh hmasak ber chu paragliding a ni tiin hneh taka kan thlen theih nan theihtawpin tan i la ang u, a ti a. Mizoram tan mel lung pawimawh tak kan phunna tur, khawvel huapa Mizoram kan phochhuah theihna hun remchang a ni, a ti.

Mizoramin paragliding a hmelhriat tanna chu kum 2008 niin Japan, Switzerland leh Korea atangin paragliders ten hemi kum October thla hian Lunglei leh Aizawlah test flight an nei a. Paragliding lama tui miten pawl siamin Mizoram Aero Sports Association (MASA) din a nih hnuah he pawl member engemawzatin paragliding an train chhuak tawh a ni. Kum 2020 paragliding world cup nghahna tur hi Serchhip khua atanga kilometre 7 vela hla, Keitum leh Serchhip inkar tlang chhipah a awm a. He hmun hi Aerosports leh Paragliding lam mi thiam, ram dang atanga lo kal ten vawi engemawzat endik tawhin a hmunhma hi paragliding neih nan Asia khawmualpuiah a tha ber pawl ni a ngaih a ni. A hmun hma in a zir em avang leh mi thahnemngaite hmalaknain kum 2018 khan helai hmunah vek hian Pre World Cup neih a lo ni tawh a, ram hrang hrang pakua (9) atangin paragliders te an tel a ni.

Paragliding Accuracy World Cup 2020 ah hian khawvel ram hrang hrang atangin paragliders 130 leh official 20 vel tel thei tura ngaih a ni a. Mizoram atangin tel thei tur license buaipui mek mi pathum an awm. World Cup hi hneh taka thlen a nih theih nan vawiin Organising Committee thukhawm chuan sub committee peng hrang hrang pali a din nghal a. Chungte chu - Logistics Committee, Programme Committee, Promotional Committee leh Infrastructure Committee te an ni. Heng Committee peng hrang hrangte kaihruaitu tur Chairman leh Secretary ruat nghal an ni a. Bawhzui ngai apiang bawhzuiin ruahmanna an siam fel hnuah Organising Committee ah an thurelte an thlen leh dawn a ni.

Paragliding Accuracy World Cup 2020 and Grand Festival Committee-ah hian Chief Patron hi Mizoram Chief Minister Pu Zoramthanga niin Patron ah Adviser to Chief Minister Pu C. Lalramzauva leh Planning Secretary Dr.C.Vanlalramsanga te an awm a. Wg.Cdr.J.Lalhmingliana, Principal Consultang, Aviation Wing, GAD chu Working Chairman niin Vice Chairman-ah Tourism Secretary Pi Esther Lalruatkimi leh Organising Secretary ah MASA President Pu J.Vanlalliana te an ni a. PWD, Power and Electricity Department, PHE, Health, UD&PA, Art and Culture, Information and Public Relations, Sports and Youth Services leh Sports Council aiawhte member an ni bawk.