Vawiin chawhma khan Aijal Club ah Confederation of Indian Industries(CII), Bamboo Development Agency, Mizoram leh Mizoram Chamber of Commerce and Industries a puipate chu inhmu khawm in India hmarchhak huam chhunga mau tawlh chungchangte, mau leh a kaihhnawih hmanga insumdawn tawnna chungchangte bakah Mau hmanga sumdawnna thununtu dan hman mek chungchangte sawi hovin ni khat awh 2nd Round Table Conference on "Bamboo Transit and regulatory Regime in North East India" an nei.
He confenrence hawnna inkhawm tawi buatsaih ah hian Industries Minister Pu H.Rohluna chu khuallian atan hman a ni a. Hawnna programme hmanzawh ah hian Technical Session neih nghal niin mithiam ten thusawina hun leh an research paper buatsaihte chhiarchhuahna leh zirhona hun te hmangin a kar laklawh hunawl ah te sawihona hun hman a ni.
Bamboo Transit & regulatory round table meeting a thusawitu Industries Minister Pu H.Rohluna chuan mau chu Pathian thil thlawn pek hlutak leh mihringte tan a tangkai em em mai a ni a,hlawk zawka sum a chantir a nih theih nan, mau kan sawngbawl dan leh kan tawlh dan ah hian bung thar kan kai a ngai a ni a ti. India hmarchhak huam chhungah tun ai hian mau hmang hian economic development nasa zawk a kalpui theih thu tarlangin harsatna te nau chinfel hmasak tur erawh a awm bawk thu a sawi a. A thil ngaih pawimawh zingah State hrang hrang te inkar ah bamboo trade agreement rintlak siam te, India ram pawna mau awm ve miah lohna ram tam tak te nena sumdawnna kawnga inremsiamna awmze nei siam te bakah Jute Board leh spice Board te anga Bamboo Board chak tak Mau hmanga sumdawnna enkawl turin a pawimawh thu te a tarlang a ni.
Mau hlutna leh a tangkai zia chu mi tam zawkin an hmelhriat tawh thu sawiin, hlawkzawk a mau hmanga sumdawnna kalpui tur erawh chuan ngaihtuahna la sen belh a ngaih thu a sawi a. Round table conference a mithiamte thil sawi ho tur zingah pawh chak zawk leh awlsam zawka mau sawngbawl dan leh sum a chantir dan te ngaihtuahzui ni se a a hlawk hlea a rin thu a sawi a ni.
2nd Round Table Conference on "Bamboo Transit and regulatory Regime in North East India" ah hian Pu K. Srinivasa Murthy, Director, CII, Pu Subhash Chandra, DIG of Forests, Ministry of Environment and Forests, Pu Kedar Panda, Project Manager, Tripura Bamboo Mission leh Mau hmanga sumdawnna enkawltute state pawn lam atangin an rawn tel a, Pu Ashutosh Kumar, Secretary, Department of Industries, Pu Rosiama Vanchhawng, Addl. PCCF,Environment & Forest Department, Pu Lalthangliana Murray, CCF, Pu Liankima Lailung, CCF leh Pu K.Lalhmingthanga, President Mizoram Chamber of Commerce & Industries, Official dang te leh Bamboo Industries neitu ten Mizoram ai an awh thung a ni.
