Nimin chawhnu khan Industries Minister Pu H.Rohluna chuan Hotel Regency ah Associated chambers of Commerce and Industries of India(ASSOCHAM) leh Ministry of Food Processing Industries tangrual in ei leh in tur bakah sum changthei thlai vawnthat dan te leh a kaihhnawih chungchanga zirhona, “Agri and Food Processor Conclave; Finance, Technology and Market” a buatsaih chu a hawng a. He hun ah hian Eitur leh sum chang thei thlai vawnthat dan chungchang bakah sawrkar atanga tanpuina dawn theih dan kawngte leh a hralhchhuahna chungchang te zirho a ni. Conclave ah hian KVK, College of Veterinary sciences & Animal Husbandry,Central Agriculture University (CAU), Selesih, Industries Department, NABARD,MIFCO, Kuthnathawktute leh Apex Bank hotute an tel a ni.

Industries Minister Pu H.Rohluna chuan mihring hriselna leh khawsak awlsam nan science a pawimawhna leh technology hmansualna in hlawkna thlen mahse hriselna a khawih pawi theih thu a sawi a. Mihring in nunkhaw chhuah nan eitur hrisel kan mamawhna kawng ah science thiamna a him chin a kan hman thiam a ngai a ni a ti. Food processing Industries chuan Mizoram ah awmzia a nei chho mek a, tihchangtlun chhoh tum niin thingtlang a awm te leh huan neia eizawng kuthnathawktute tan khawpui mite sum leh pai ah an tluk ve theih nan a tangkai hle dawn niin a sawi a. He hlawhtlinna hmu tur erawh chuan awmze neia Industries Department leh Agriculture Department an thawhho a ngai a ni a ti.

Thusawitu dang, Dr. Ombeer Tyagy, Sr.Director, ASSOCHAM chuan Mizoram sik leh sa chu thlai eng chi pawh that theihna hmun leh ran chi hrang hrang vulh theihna a nih avangin food processing nasa zawka kalpui tulna hmun a ni a. Hemi kawngah hian zirtirna, mipui hnena thiamna pek leh tanpuina awm thei te kawhhmuh a tul takzet a ni tiin a sawi a. Tanpui tlaka hma la an awm a nih chuan ASSOCHAM leh Ministry of Food processing chu a in hawn thu a sawiin Ministry of Food Processing hnuaia department hrang hrang MSME, NHB, APEDA, QCI, NHM bakah NABARD ah te zawh chian ni se a that tur thu a sawi a ni.

MIFCO Managing Director Pu Hrangtawna, Apex Bank Chief Manager Pu R.Vanlalmuana leh Dr.D.Karthiresan, Dean, CVS,CAU te pawhin food processing a hma la tute leh he hun a tel te tana hriattur pawimawh an sawi bawk a ni.