Vawiin chawhma dar 11:00 am khan Saiha District Bawrhsap Office chamber-ah Saiha District chhunga Biometric Enrollment kalpui mek chungchangah meeting neih a ni. He meeting hi DC in-charge la mektu Pi Marilyn Rualzakhumthangi, SDO(S) in a kaihruai a ni.

He Meeting-ah hian Saiha District Urban Area huam chhunga Biometric enrollment hi 25th July, 2014 atanga lo kalpui tawh a nih thu tarlan a ni a. Saiha District Urban area chhunga enrollment percentage hi a sang lo hle a, 25.14% chauh a ni. Hei hi Thuneihtu lam chuan tun hnaia Saiha khawpui chhunga Picketing leh Total Bandh avang te, power supply mumal loh vang te leh sakawlh number hlauh avang te a nih an rin thu an sawilang a ni.

Pi Marilyn SDO(S) chuan he Biometric enrollment kalpui nan hian State sawrkar emaw central sawrkar atangin emaw, chengkhat mah an dawn loh thu sawilangin, Joint VC leh vengchhung VC theuh ten an vengchhunga enrollment buaipuitu enumerator-te leh operator-te thingpui leh mamawh dangte an lo buaipui thin avangin lawmthu a sawi a. SDO(S) chuan sawrkar aiawhin Tlawmngai pawl hrang hrang hruaitute, Joint VC hruaitute, Kohhran hrang hrang hruaitute, zirlai pawl hruaitute leh Saiha District MJA member te chu sawrkar tawiawm tlat turin a ngen hlawm a, an tawiawmna tel lo chuan he Bio Metric Enrollment hi a hlawhtling thei lo a ni, a ti. November atang hian Saiha District Rural lamah Enrollment beihpui hi an thlak ve thung dawn a, 20th December, 2014 hmaa zawh vek an tum a ni.

Meeting-ah hian Biometric Enrollment chungchang huangzau taka sawiho a ni a,an lo kalpui tawhna a harsatna an tawh hrang hrang te pawh tarlan a ni a. Aadhar card lo thleng tawh ah Address dik lo leh hming dik lo a tam hle thu meeting-ah hian sawichhuah a ni. Member kalkhawmte chuan DC Office lama thuneihtute chu he Biometric enrollment tangkaizia leh hlauhawm lohzia te hi Booklet in emaw pamphlet in emaw siam a, mipuite hnena thehdarh turin an ngen a ni.

He Meeting-ah hian Official te bakah, Tlawmngai pawl hrang hrang hruaitute, Joint VC hruaitute, Kohhran hrang hrang hruaitute leh Saiha District MJA member te an tel kim hle a ni.