Vawiin chawhnu dar 2 khan Industries Minister Pu H. Rohluna chuan disposable cup siamna, ‘Dispocraft’ chu Industrial Growth Centre (IGC), Luangmualah a hawng a. R&R Industry enkawl, ‘Dispocraft’ hian nikhatah disposable cup nuai khat chuang lai a siam chhuak thei a ni.

‘Dispocraft’ hawngtu Industries Minister Pu H. Rohluna chuan thusawiin Mizo mipuite hman tangkai em em, YMA no hlan thei hiala sawi thin, disposable cup siamna Mizoramah Mizo ngeiin a siam hi a ropui hle a, Mizoten bung thar kan kai a ni, a ti a. Industry din hi thil namailo tak, hlawkna hmuh thuai thuai duh tan hlawhtlin harsa tak a nih avangin R&R Industry neitute chu ‘Dispocraft’ a hlawhtlin ngei theih nan teirei peih turin a sawm bawk. Industries department tum ber chu mimal leh pawl, industry din duhte remchanna siam sak hi a ni tih sawiin Industries Minister chuan, “Industry tak hmuh tur awm lova hamthatna dawn tuma, Industry Registration neite chu chhui chian an ni ang,” a ti bawk. Sawrkar-in industry hmasawnna tura scheme hrang hrang a neih thu leh Nationalised Bank-te pawh hemi kawnga sawrkar hmalakna thawhpui tura beisei an nih lain, mi rinawmlo thenkhatten loan an rulh thatloh avangin thalaite kawng a ti bo thin tih sawiin Minister chuan thalaite chu ngaihtuahna thar nen Entrepreneurship lam ngaihven turin a sawm bawk. Mizote hi industry lamah kan la hlawhtling tawklo tih sawiin Minister chuan thalaite tan eizawnna harsa zel hian industry lamah Mizote a tih thanharh ngei a beisei thu a sawi bawk. Industries Minister chuan Mizorama Industry-te chu sawrkar laipui atanga hamthatna an dawn tur ang te an dawn theih nan record vawn that lama tan la turin a ngen bawk.

Industries Department Director, Pu J. Hmingthanmawia pawhin thu sawiin Mizorama industry tamtak chu Sick Unit an nih deuh vek laia Industry thar tha tak a lo piang hi ka lawm takzet a ni, a ti a.

Mizoram Chamber of Industry President pawhin Mizote mamawh tak mai Mizoram chhung ngeia siam chhuah a nih dawn avanga lawmthu sawiin Mizoram chhunga Industry neitute harsatna sutkianpui tura an pawl hmalakna a tarlang bawk.

Dispocraft hawnna inkhawm hi Pu H. Challiana’n a kaihruai a. Industry din tura hmalatu, Pu P.C. Vanlalruata chuan Dispocraft din tura a hmalak dan tlangpui report a pe bawk. He hunah hian Industries Department hotute leh P&E hotuten bakah mi thahnem tak an tel a. Industry neitu Pi Rochungnungi chuan lawmthu sawiin hun a khar a ni.

Dispocraft din nan hian cheng nuai za leh sawmsarih chuang senral a niin Vijjaya bank-in an finance a. Disposable cup siam nan hian Rajoo Engineer siam khawl hmangin Reliance company siam hmanraw tha bik hmangin disposable cup hi siam a ni a. R&R Industry hian Dispocraft-ah hian hnathawktu mi 15 vel an ruai mek bawk.