Army Recruitment Rally 2016-a physical leh medical re-examination pal tlang tawh, Mizoram Youth Commission-in free coaching a pek, ni 29.5.2016-a Tripura khawpui Agartala-a Written Exam bei tur mi 35 te thlahna hun chu vawiin tlai dar 3 khan IAS & SSC Coaching Centre, Dinthar-II, Aizawl-ah MYC Chairman Pu T.Sangkunga, MLA hovin neih a ni.
He hun hmanpuitu MYC Chairman chuan sipai lak chungchanga MYC-in tha a lo thawh ve tawh dante tarlangin, sipai lakna turah hian mi 173 tan March 2016-a coaching class an lo buatsaih tawh thu leh tun kum kal mekah Army-ah mi 103, Air Force-ah mi 11 leh Navy-ah mi 17 lak an nih tawh thu a sawi a. Assam Rifles-in kumin chhung ngeia Mizoramah sipai 100 lak an tum thu leh November 2016-a Army Recruitment Rally a awm leh tur thu a tarlang bawk.
Pu T.Sangkunga chuan August 2016-a IAS Prelims leh SSC (CGL) Prelims Examination a awm dawn thu a sawi a. MYC-in IAS Coaching, SSC Coaching leh DoNER sponsored Skill Development Programme-a kalpui mekah Batch thar lak thuai an tum thu leh he lama tui mite tan ngaihven theih reng a nih thu a sawi. MYC-in Mizo thalaite tan kawng a sial mek zel a, thalaite tan chuan sawrkar pawh a inhawng reng a ni, a ti.
Sipai written exam bei turte thlahna hunah hian Pu T.Sangkunga chuan exam turte chu duhsakna hlanin, anmahni tan mai ni lo, ram leh hnam tana theihtawp chhuah turin leh tun tuma an hlawhtling lo a nih pawha rilru hnual mai lova thahnemngai taka bei zel turin a fuih a ni.
Thlahna hun hi MYC Under Secretary Pu Lalsawmzuala’n a kaihruai a. IAS & SSC Coaching Centre Co-ordinator Pu H.Vanlalchhanchhuaha leh instructor-te pawh he hunah hian an tel a. Hun hman zawhah exam turte chuan sumo-in Agartala an pan a ni.
