Nimin khan Industries Minister Pu H. Rohluna chuan Kawlkulh North Community Hall-a puantah zirna, Kawlkulh Handloom Cluster, kharna a hmanpui a. He hunah hian puantahna in, workshed tur sak nan Rs. 26,000 theuh training chhuak mi 90 te hnenah a sem nghal bawk. Industries Minister hi Industries Department hotu - Director Pu J. Hmingthanmawia, MCS, Functional Manager Pu Lalhrilliana, EO Pu Lalchunga leh AE Pu Laldawla bakah Champhai DIPRO Pu Neng Thianlala, MIS, leh Khawzawl SDEO Pu Lalthanzira ten an tawiawm a ni.

Khuallian, Industries Minister Pu H. Rohluna chuan puantah training chhuakte leh khawtlang mipui kalkhawmte hmaah thu sawiin puantah chu Mizo society a thil bet tlat, pi leh pu atanga kan thil thiam leh tun thleng pawha eizawnna atana chhawm nun tlak a ni tiin puantah lama Mizoramin hmasawn chak thu leh thenawm state-tinah Mizo puan kan zuar thei ta hial chu lawmawm a tih thu a sawi a. Tlangmite kut chhuak rau rauvah chuan Mizo kutchhuak hi a chhuanawm hle tih sawiin khuallian chuan, “Rawngchi thlak leh zeh mawi lamah Mizote thiamna a sang filawr hle a ni,” a ti bawk. Industries Minister chuan sawrkarin puantahtu chher chhuah belh leh chhawmdawl zel a tum thu sawiin Mizoramah pawh Cluster Development Proggrame hmun 17 laiah kalpui a nih thu leh Kawlkulh Cluster chu a hmawrbawkna a nih thu sawiin, Puantahna khawl changkang zawk hmanga puan tah thei tura zir chhuak mi 90 te chu puantahna in, workshed sakna tur cheng sing hnih leh sang ruk theuh pek nghal an nih avangin Kawlkulh leh a chhehvelah eizawnna thar leh rahbi thar duhawm tak a thlen ngei a beisei thu leh Kawlkulh Handloom Cluster chu model cluster nih tum turin a fuih a. Sawrkarin training a buatsaih kher nghak lova a tuimite chu thenawm khawveng lo inzirtir chhawng turin khuallian chuan kalkhawmte a chah bawk. Puantahtuten awlsam taka la leina tur an neih theih nan sawrkarin Weavers’ Credit Card scheme a buatsaih tih sawiin Minister chuan he scheme-ah hian bank-ten a pung tlem, 3% lekin loan cheng nuai thum thleng an pe thei a ni a ti a, hemi kawnga mamawhtute pui tura Industries Department hotute an inpeih reng thu a sawi bawk.

Kawlkulh Handloom Cluster kharna leh Puantahna in, Workshed sakna tur semna inkhawm hi Industries Department Director, Pu J. Hmingthanmawia, MCS in kaihruaiin, puantah leh a kaihhnawih chu Mizoram tan eizawnna kawl eng ber pawl leh mi tam tak tan pawh eizawnna awm theihna a nih avangin kawngvawn puantah kalsan a, hlawk zawka puan tah a nih theih nan Kawlkulh Handloom Cluster hi buatsaih a nih thu a sawi a. Pu Lalhrilliana, Functional Manager, chuan Technical Report peiin Kawlkulh Handloom Cluster kalpui a nih dan leh Mizoram puma puantah kawnga sawrkar hmalak dan a tarlang a ni. Report-a tarlan a nih angina sawrkar laipuiin National Handloom Development Programme (NHDP) a kalpui mekah hian hmarchhak state-te hamthatna tur bik, North Eastern Region Textile Promotion Scheme (NERTPS) a duang a. Hemi hnuaia Scheme pahnih – Cluster Development Programme (CDP) leh Integrated Skill Development Scheme (ISDS) te atangin Mizoram chuan tanpuina a dawng a ni. CDP atana Mizoram sum dawn tur hi avaiin cheng vaibelchhe 16.44 a niin hemi atang hian 1st leh 2nd Installment atan cheng vaibelchhe 9.07 dawn tawh a ni a. Kawlkulh cluster-ah hian Puantahna in tur, Workshed sak nan mi pakhat zelah cheng sing hnih leh sang ruk zela pek an ni. ISDS hi training-na sum ber niin Mizoram sum dawn tur hi avaiin cheng vaibelchhe 1.12 a ni thung. Kawlkulh cluster tan hian CFC sak tura ruahman niin hemi atan hian chen nuai 7.50 hmuh tawh a ni a, cheng nuai 12.5 dang la hmuh belh beisei a ni.