Nimin chawhnu dar 2:30 khan Parliamentary Secretary Pu TT Zothansanga, Champhai North bialtu MLA, chuan Govt. Champhai College Seminar Hall a hawng a.
Parliamentary Secretary Pu TT Zothansanga, Champhai North bialtu MLA, chuan zirna pawimawh zia sawiin, “Tunlaiah hian hmasawnna chi hrang hrang hi a kal chak viau mahse India ram zalenna sualtute tawngkam pakhat, ‘India ram in zalenna tak tak kan neih ve dawn chuan western education atanga kan tan leh a ngai a, keimahni India ram education atang hi chuan kan umpha ve ngai dawn lova western education hi a pawimawh reng dawn a , an zir ang kan zir anga, an tih theih ang zawng zawng kan tih theih hunah India ram hi a zalen dawn chauh a ni,’ tia an lo sawi chu la dik zel a ni,” a ti a. Khuallian Pu TT Zothansanga chuan tunlai khawvel intlansiakna sang takah hian mi nih ang ni pha ve tur chuan mi tih ang tih ve a, mi hriat ang hriat ve a ngai tlat a, chumi ti thei tura kan thalaite kaihruai theitu chu professor rualte an ni tih sawiin, theihtawp chhuaha tan la thar zel tur leh Champhai khawtlang mai ni lo, India ram thleng pawha thalaite hlangkai turin zirtirtu kalkhawmte a sawm bawk.
Govt. Champhai College Seminar Hall hawnna inkhawm hi Govt. Champhai College Principal Pu Lalnunmawia’n a kaihruai a. Associate Professor Pu P Lalhmingliana chuan lawmthu sawiin hun a khar a ni.
Govt. Champhai College Seminar Hall sak nan hian Lok Sabha MP LAD Fund Rs. 5,00,000 hmanga sak a ni a. RUSA atangin sound system, thuthleng, dawhkan, Projector, Bar leh Grill siamna senso atan tur Rs. 2,35,000 hmuh a ni bawk. UGC atanga sum hmuh Rs. 1,00,000 hmangin ceiling leh electric wiring thawh a ni bawk.
Parliamentary Secretary Pu TT Zothansanga, Champhai North bialtu MLA, hian tarlan tawh angin July ni 6 khan Ngaizawl Branch MHIP Silver Jubilee a hmanpui a. He hunah hian Ngaizawl khawtlang tana a hmalakna turte mipui hriatah puangin Ngaizawl High School building chu kumin 2016 chhunga sak a tum thu te, Kumin chhung veka an field laih zawh sak a tum thu te, Neihdawn - Ngaizawl kawng chu tun term chhung ngeia laih tlang sak a tum thu te, Mi harsa zualte inchung tur rangva pek a tum thu leh HSLC Examination a ti thate lawmpuina -1st Division tan Rs. 5,000, 2nd Division tan Rs. 3,000 leh 3rd Division tan Rs. 1,000 a pek tur thu te a sawi lang a ni.
