Industry sector hnuaia Tailoring leh Carpentry & Wood Processing thlangtute hnenah NLUP tanpuina 2nd installment chu Aizawl district ahpek chhuah tan a ni ve leh ta a. A bul tan nan vawiin khan Durtlang Community Hall-ah Aizawl North I bial tan NLUP Nodal Minister Pu H. Liansailova’n tailoring thlangtute hnenah punathui khawl chi 3 leh carpentry thlangtute hnenah thingzaina khawl a hlan a ni.

Pu Liansailova chuan central sorkar-a miretheite khai chhuahna programme zawng zawngah tanpuina sum pek theih sang ber chu Rs.25000/- a nih laiin Mizoram sorkar chuan NLUP hmangin mahni puala eizawnna bul tan theilo te bul tan sak nan chhungkaw pakhat zel nuai 1 aia tlem lo tanpuina a thlawnin a pe a. Hetiang ang project lian tham kalpui tur hian ngaihtuahna tam tak sen a tul bakah tha leh hun pawh a duh rei bawk a. A kalpui danah engmah thup awm lovin lang tlang taka engkim tih a ni bawk a. Hetiang ruahmanna lian hi a kalpui a hautakin harsastna te pawh awm palh thei a ni a. Englai pawha sawiselna ringawt zawngtu te chu NLUP hlawhtlin hlautute an ni, a ti a. NLUP hlawhtlin na chu Implementing Board, department leh a dawngtu te kutah a innghat a ni, tiin Pu Liansailova chuan NIB leh department ten theihtawp an chhuah tawh a, tanpuina dawngtu ten rinawm taka an mawhphurhna an hlen a ngai ve ta, a ti a. NLUP dawngtu zinga rinawm lo mi thenkhat chungchang tarlangin Pu Liansailova chuan corruption hi mi tam tak chuan midang tih a nih chauhvin kan hua a; corruption hi khawlaia au reh chi a ni lova, mahni zawn theuhva kan rinawm hian corruption chu kan do hneh mai dawn a ni, a ti a. Industries sector hnuaia tanpuina dawng hmasa tute chu midang entawn tlaka an tanpuina dawn te hmang dik turin a chah a ni.

NLUP hnuaia tailoring thlangtute hi puanthui khawl chi 3- Design leh thui parna khawl(Janome Mystyle), Kekhawl (Tailor Super Delux)leh Overlock Machine pek an nih bakah Rs.22,300/- an account ah dah sak tur an ni a. Carpentry thlangtute chu Vertical Band Saw leh Rs.20320/- an account ah dah sak tur an ni bawk. Industries sector hnuaia tailoring leh carpentry 2nd installment hi Kolasib, Lunglei, Lawngtlai leh Saiha district ah te chuan sem chhuah vek a ni tawh a. Heng district ah te leh vawiina Aizawl North I biala tanpuina dawngtute chu USHA company dealer ten khawl hman dan training an neihpui nghal zel a ni.

Vawiina khawl sem inkhawm hi NIB Chairman Pu R.Selthuama’n a kaihruai a. Mizoram Law Commission Chairman Pu R.L.Rinawma pawhin tanpuina dawngtute fuihna thu a sawi bawk a. Hemi hnu hian Khuallian Pu Liansailova hovin Durtlanga NLUP bawng vulhtu, vanduaina tawkte an tlawh nghal a ni.