Environment & Forests Minister Pu H. Rohluna chuan hmasawnna tluantling nei thei tur chuan mihring hrisel nih a ngai a, hriselna chu sik leh sa mumal leh duhawm tak, min hualtu chhehvel boruak thianghlim atanga kan hmuh theih an ni, a ti.
He thu hi vawiina Mizoram Football Association buatsaih U-17 Inter Village Football Tournament 2011 final, Ramhlun Sports Complex-a a sawi a ni. Forests Minister chuan infiammi kalkhawm te chu ramngaw humhalh pawimawhzia an hriat tawh angin ram kang ven kawngah te, chenna boruak, sik leh sa vawnhim kawngah te mawh an phur a ni tih hre turin leh midang te hrilh chhawng turin a chah a, fimkhurloh vanga kangmei chhuak thin te chu a pawi takzet a ni tiin mitin fimkhur turin a chah bawk. Minister chuan infiammi te hmasawnna turin sorkar chuan nasa takin hma a la a, ram chhung leh ram pawnah Mizo infiammi te an hlawhtling mek zel a ni, a ti a. Infiammi te chu hlawhtling turin insumtheihna, taihmakna leh hriselna an neih a pawimawh a ni tiin an nun vawng tha turin a chah a ni.
Final khelh hma hun tawi te buatsaih hi MFA President Pu Lal Thanzara’n a kaihruai a. Parliamentary Secretary leh State Level Sub Committee on Fire Prevention Chairman ni bawk Pu Lal Thanzara chuan ram kang ven pawimawhzia tlangaupui zawnga Environment and Forests Department nen tangkawpa he Tournament buatsaih dan sawiin Minister chungah lawmthu a hrilh.
U-17 Inter Village Football Tournament hi December ni 1 atanga khelh tan niin Mizoram hmun hrang hrang atangin Team 137 an tel. Final-ah hian Venghlui Local Council Team chuan Chhinga Veng Local Council Team chu 2-1 a hnehin an Champion a, Trophy, Certificate leh tangkafai Rs. 50,000 an dawng. Runners Up hian Trophy, Certificate leh tangkafai Rs. 20,000 an dawng thung. Semi Finalists, Zanlawn VC Team leh Aizawl Venglai Local Council Team ten Certificate leh tangkafai Rs. 5,000 ve ve an dawng a. Fairplay Award hi Chhinga Veng Local Council Team ten dawngin Trophy leh Rs. 5,000 an la a. Most Promising Player a thlan Isak Vanmalsawma, Venghlui chuan Trophy leh Rs. 2,000 a dawng.
