No.478/2020-2021
Vawiin khan Information & Communications Technology Minister Pu Robert Romawia Royte chuan Mizoram chhunga Telecom hotute leh thawktute Secretariat Conference Hall, MINECO ah meeting a neih pui.
ICT Minister chuan Mizoram sawrkarin lockdown a kalpui chhunga inbiak pawhna, telecommunication service thazawk a awm theihnana hmalak ngai te, telecom hotute hi a sawipui a, chung zingah chuan Telecom engineer ten hmun hla leh kalpawh mai theihlohna hmun hrang hranga network coverage zau zawk leh tluang zawka neih a nih nana hna an chhunzawm theihnan, District Bawrhsap zawng zawng ICT Secretary Pu H.Lalengmawia’n lehkha emaw tawngkaa a biak tur thu a sawi a. Telecom ten hmalak an duhna District Bawrhsap te be rawn zel turin a hrilh bawk a. Mizoram chungah BSNL ten Aizawl, Kolasib leh Lunglei District chhung hmun riat-a harsatna an tawh te ziakin ICT Secretary hnenah thehlut turin a ti bawk a ni. BSNL hotute atangin online bill pe thiamlo an tam avangin, online bill pekna counter pawh fimkhur takin hawn a ni, tih ngaihthlak a ni. Vairengte-ah telecom bungrua phur motor tangkhang mek ten Mizoram an lut vat theih nan Minister chuan hma a lak tur thu leh, bungrua phurtu ten mCovid application download a, mpass hmang tangkaia hrilh turin telecom hotute chu a ngen bawk a.
Telecom a thawkte chetvel chu Local Task Force leh Village Task Force te chuan lo danglo tura a ngen thu, minister hian a sawi bawk a. State dang atanga rawn lut an nih loh chuan quarantine an ngaih loh thu, a sawi bawk a ni. Telecom Customer Service Point hrang hrang hawn a nih theihnan ICT Secretary chu hma la turin a hrilh bawk a ni. Minister chuan Mizoram chhung a inbiak pawhna service tha a awm reng theih nan Village Task Force ten an khua leh khua inkar fibre line veng turin a ngen bawk a ni.
Minister Pu Robert Romawia Royte chuan ICT Department Minister a nihna angin telecom hotute leh department kaihhnawih dangte nen thla li dana routine meeting neih a rawt chu pawm tlan a ni.
Meeting hi ICT Secretary, ICT Joint Secretary, NELSA Director, BSNL General Manager leh Airtel, Jio, Bharti Hexacom, VIOM, ITIL, GTL, ATC, Infratel aiawhte an tel a ni.
