Vawiin September 18 zing khan Information and Public Relations Department Director, Pu Jim K Chozah, MIS chuan Lawngtlai Mizoram Journalist Association chu Lawngtlai District Information Office Chamber-ah a kawm a, Lawngtlaia chanchinbu mite an tel tha hle.

Pu Jim K Chozah hian District Information and Public Relations Office pathum; Lunglei, Lawngtlai leh Saiha Office te enfiah turin nimin khan Aizawl a chhuahsan a, amaherawh chu Lawngtlai atanga Saiha panna kawng a tlang that loh avangin Lawngtlai-ah a tawp rih a. Lawngtlaia a cham chhung hian Lawngtlai District huam chhunga chanchinbumite chu District Information Office Chamber-ah hmuin a kawm a ni.

Director chuan ‘sawrkar chak tak zarah Lawngtlai District-in Information Officer thar an nei ta chu lawmawm a tih thu a sawi a, District Office pawhin hma a sawn zel theih nan Department-in theih tawp a chhuah zel dawn a ni’ a ti a. Chanchinbumite chu Information Department te nena thawk ho leh unau ang maia engkim ti za thin kan nih avangin Information Officer thar pawh tha taka lo thawhpuia a theih ang ang a lo inpui bawm thin tura chah in, tha taka an lo puih tawh thinnaah lawmthu a hrilh bawk a ni.

Chanchinbumite hian Director chu an mamawhte lo hrilhin harsatna an tawh hrang hrangte an lo thlen te chu a theih ang anga hma lak pui a tiam a ni.

Pu Jim K. Chozah hian vawiin vek hian Aizawl lam a pan leh nghal a ni.