SCERT Science Promotion Wing buatsaihin vawiin khan Vanapa Hall-ah zirlai Science leh Maths a tithatelehStateLevel National Talent Search a tithate hnenah lawmman pawisafai sem a ni. He hunah hian Parliamentary Secretary Pu Lal Thanzara chu Khuallian niin lawmman hi a sem bawk.

Pu Lal Thanzara chuan ram hmasawnna thang zelah Science leh Maths subject hian hmun pawimawh tak an chang tih sawiin, heng subject a zirlai thiam fal bikte hnena lawmman sem chu lawmawm a tih thu sawiin, an thil dawn chu an hmabak awm zel turah chawkphurtu ni thei se a ti a ni. Zirlai kalkhawmte chu tum mumal tak neia zir turin Khuallian chuan a fuih bawk a. Ram nghahfak an nih hre reng chungin nun uluk a, sual laka inthiarfihlim turin leh, zonun zemawi chhawmnung zel turin zirlai kalkhawmte chu a fuih a ni.

Education Department chuan ram hmasawnna tih chak kawnga Science leh Mathematics subject pawimawhzia hi hriaiin kum 1978 atang khan Cash Award for Proficiency in Science & Mathematics hi a lo duangchhuak a. Kum chatlak awm miah lova sem thin niin, tun tum hi a vawi 36 semna a ni a. Primary School Leaving Certificate leh Middle School Leaving Certificate Examination hi kum 2011 atang khan tihtawp a nih avangin Primary leh Middle School tan lawmman sem hi tihtawp a ni. He Cash Award dawng thei turte chu HSLC, HSSLC examination result atang leh Class IX & XI Promotion Examination Result atanga Science & Mathematics subject a titha zual bik te an ni. Tun tumah hian lawmman dawng chu HSSLC-ah mi 13, HSLC-ah mi 24, Class XI-ah mi 8, leh Class IX-ah mi 49 – an vaiin mi 94 an ni.

Cash Award for Proficiency in Science & Mathematics bakah hian State Level National Talent Search, 2012 neih a tithazual pali hnenah lawmpuina sem a ni bawk.

Vawiin lawmman semna inkhawm hi SCERT Joint Director Pi Sangthanmawii’n a kaihruai a, Pi D. Ramdinthangi, Deputy Director (VOC) chuan lawmthusawiin a khar a ni.