No.540/2020-2021

Vawiin khan Information and Public Relations Minister Pu Lalruatkima office-ah I&PR Secretary Pu Sangdingliana, Director Pi Lallianpuii leh I&PR Officer dangten meeting an nei a. COVID-19 lockdown chhunga I&PR hmalaknate an sawiho.

Inkharkhipna kalpui mek laiin Information and Public Relations Department chu mipuite hnena thudik puangzartu an nih avangin chawl lovin an hna a kal reng a. COVID-19 chungchanga Mizoram dinhmun te, sawrkar hmalakna te, ram pawn hmun hrang hranga Mizoram mi awm mekte hriat tur te, talk show leh message bakah thil pawimawh dang sawkarin puanzar duh a neih apiang tichhuakin hna an thawk reng tih sawiin Minister chuan thawktute inpeknaah lawmthu a sawi a ni.

Information Minister Pu Lalruatkima chuan sawrkar leh mipui tanrualna zarah damlo pakhat kan neih mek tihloh chu tun thlengin COVID19 lakah kan la him niin a lang, a ti a. COVID19 dona ral hmatawnga awm medical mi leh sa te, venhimna hna thawktu police te, mipui te himnana tlawmngaia inpe Local leh Village Level Task Force te, COVID19 kaihhnawiha sawrkar hnathawk leh mipui mimir pen chhuak zawng zawng te hnenah Information Minister chuan lawmthu a sawi a ni. He hrileng avang hian eng chen nge nunphung pangngai sawi danglama a awm dawn tih leh kan hmabakah eng nge lo thleng dawn tih sawi lawk theih a nih loh avangin Mizoram mipuiten Zonunmawi tlawmngaihna, mahni aia harsa zawkte chhawm dawl, ‘sem sem dam dam ei bil thi thi’ kan tih thinte chhawm nung zel turin a chah a. Tun thlenga chhuanchham, ei tur neilo an awm lo hi mipui leh sawrkar tanrual vang a ni, a ti. He COVID hri leng vanga harsatna kan tawh kara mipui thilphalna leh thahnemngaihna chhuanawm tiin CM Relief Fund-ah chhawmdawl ngaite tanpui tur sum tam tak an thawhkhawm a. Heng mi thahnemngaite rawngbawlna hi chanchinbuahte uar leh zuala puan ni se, a lawmawm hle ang, a ti bawk.

Pu Lalruatkima chuan COVID19 hi eng chen nge a len dawn hriat theih a ni lova. Mipuite englai pawhin kan fimkhur reng a tul tih hre thar leh turin a chah a. Lockdown kalpui a ni emaw, ni lo emaw, he hri leng hi a bo hma chuan social distancing te, kut silfai te, mask vuah te leh he natna laka kan fihlimna tur sawrkarin kaihhruaina a siam zawng zawngte uluk taka zawm zel turin mipuite a ngen a ni.