1043/2023-2024

Aizawl the 5th July, 2023 : Vawiin khan Dinthar Branch YMA chuan an din champhaphak vawi 50-na lawmna hun chu Dinthar Branch YMA Hall ah an hmang a. Minister Pu Lalruatkima, bialtu MLA ni bawk chu khuallian a ni a, Central YMA President Pu R Lalngheta chu khual zahawm a ni. He hunah hian MLA Pu Lalrinsanga Ralte leh Pu K Laldawngliana bakah Aizawl Deputy Mayor Pu R Thanglura te pawh he hunah hian an tel a ni.

Pu Lalruatkima chuan Jubilee hmangtute zawng zawng chibai bukin he ni hi Dinthar khawtlang mipuite tana hun lawmawm, ni chhinchhiahtlak a ni, a ti. An din champhaphak kum 50na lawmtu YMA member te fuihin an khawtlang leh Zoram tan Jubilee hian eng rah tha nge a chhuah dawn tih ngaihtuah turin a chah a. YMA chu political party, kohhran leh pawl hrang hrangte an luan khawmna, pawl ropui a ni a, he pawla tel te hian kan khawtlang chhiat leh thatah mawh kan phur a ni, a ti. Dinthar veng chu veng inlungrual leh inpumkhat an ni a, hmasawnna kawngah pawh chak takin ke an pen a; infiamna te, zirna te, eizawnna leh kawng hrang hrangah mi hmingtha tam tak an chher chhuak tawh a ni, Minister chuan a ti a. A bial chhung a nih angin sawrkarin hmasawnna hna a thawh thenkhat te a tarlang a, chung zingah chuan On Road Smart Parking sak tan mek te, damlo awmpuitute chawlh hahdamna tur Dharamsala (khualbuk) sak mek te, Basket Ball Court laih mek te leh City Centre sakna tura ruahmanna siam a nih thu te a sawilang a ni. Pu Lalruatkima chuan YMA hi Mizo hnam humhimtu, kan hnam darthlalang a ni tiin Mizo hnam rohlu tlawmngaihna leh rinawmna vawng nung zel turin Jubilee lawmtute a chah a, ram leh hnam hmasawn nana thawk zel turin a sawm a ni.

Pu R Lalngheta chuan Dinthar YMA te Jubilee chibai bukin hun harsa kara bul tantu hruaitu hmasa te meichher lo chhit tawh kal zelah vawiina mite hian a hlawkna kan tel a ni, a ti. Central YMA hmalakna pawimawh tak tak sawilangin Zohnahthlak unau raltlan te tana YMA hmalakna a sawi a. Manipur a buaina thleng mek chungchangah Central YMA leh tlawmngai pawl dang te inchhunkhawmna NGO Coordination Committee te hmalakna a sawi a. Kan unau te thlavang hauh nana punkhawmte pawh rel a nih laiin Manipur a Zohnahthlak unauten ti rih lo tura an ngenna avangin an zai ngaiin thulh a ni, a ti. Zohnahthlak unaute nen an inbiak pawh reng thu sawiin Manipur-a Zo hnam peng hrang hrang aiawhtute nen Aizawlah meeting neih ho tum niin, hmalak zel dan tur ngaihtuah ho a ni ang Central YMA President chuan a ti bawk.

Dinthar Branch YMA hi kum 1973 July ni 5 khan Dawrpui Vengthar atangin a indang a. Hemi kum hian member 219 an awm. An din tan atanga kum 50na ah hian member 3409 an awm mek a ni. Kum kalta July 5 khan Dinthar YMA Hall ah Golden Jubilee hawnna hun leh mei detna hun neih a ni a. A tah tawlin program chhawng tam tak siam niin a lawmna pui ber chu vawiin khan neih a ni. Jubilee pual hian Aizawl Civil Hospital ah thisen unit 119 an pe a. Sports te, cultural night te, concert te buatsaih niin mimal leh chhungkaw hrang hrangin Jubilee pual hian Dinthar veng chhungah khawtlang hman tangkai tur an siam bawk a ni.

Vawiin programme ah hian hruaitu hlui mi 79 te hnenah lawmpuina thilpek an hlan a. Jubilee puala thu inziahsiak lawmman sem a ni a. Photo exhibition an buatsaih bawk a ni.