1044/2023-2024

Dated Serchhip, the 5th July, 2023: Vawiin khan Serchhip DC Meeting Hall ah district chhunga Swatch Bharat Missions (Grameen) leh Jal Jeevan Missions hmalakna te thlirletna (Review Meeting) Pi Nazuk Kumar, District bawrhsap hova neih a ni.

Pi Nazuk Kumar chuan, PHE Serchhip Division ten Swatch Bharat Missions ah leh Jal Jeevan Missions ah tha takin hna an thawk tih kan hria a, a lawmawm hle a, kan district pawhin a hmingthatpui hle a ni, a ti a. An hmabak la awmte pawh tha taka thawk zui zel thei turin duhsakna a hlan a ni.

Er. Isaac Lalchhuanawma, EE, PHE, Serchhip WATSAN Division chuan report tlangpui a pe a. Jal Jeevan Missions hnuaiah hian kum 2019- 2020 action plan kha heng khaw sawm leh pariat: Sialsir, Hmunzawl, E. Thinglian, Khawlailung, Lungkawlh, Hriangtlang, Buangpui, Vanchengte, Chhingchhip, Chanin, Buhkangkawn, Hmuntha, Khawbel, Thentlang, Hmawngkawn, Baktawng, Phulmawi leh Phaibawk ah te thawh zawh an ni a, annual action plan 2020-21 hnuaiah heng khaw pasarih: Chekawn, Ngentiang, Rullam, Tuichang, E. Bungtlang, Neihloh leh Hualtu te thawh zawh an ni leh a, an zinga Hualtu tih loh te hi Functional Household Tap Water Connection nena tihfel vek an ni a, a hnuah Hualtu pawh hi tihfel zui leh a ni ta bawk. Heng khuate bakah hian khaw 21 dang te pawh tunah hian thawh mek a ni a, a tam zawkte hi thawh zawh tep tawh niin, an zinga khaw pakua hi Solar Pump hmanga thawh an ni. District chhunga JJM hmalakna khua 35 ah khaw 13 heng: Chekawn, Sialsir, Buhkangkawn, Chanin, Hualtu, Thentlang, Chhingchhip, Ngentiang, Rullam, Tuichang, E. Bungtlang, Neihloh leh Buangpui te chu tuilakna leh tui connection nei vek tawh khua, Har Ghar Jal Villages an ni tawh a ni.