No.3142/2019-2020

Vawiin khan I&PR Director Pi Lallianpuii pisa-ah I&PR Directorate a thawk staff zawng zawngte inkohkhawm niin tunlai khawvelin a buaipui hrileng novel coronavirus (COVID-19) laka inveng tura hriattur pawimawhte inzirtirna hun hman a ni.

He hunah hian I&PR Director Pi lallianpuii chuan sawrkar hnathawk an nih avangin sawrkar in thupek a chhuah a nih loh chuan office an kai chu thulh theih a ni lova, thawktute pawh hmun hrang hranga chhuah ngai an nih thin avangin COVID-19 laka him tura fimkhur tlan a pawimawh thu a sawi a, hna tul leh thildang vanga office chhuahsan tur leh office a lo kir leh zawng zawng ten uluk taka kut silfai thin tura chahin office luhna gate pui bulah temporary a kut silfaina wash basin dah a nih tawh dawn avangin office atanga lut/chhuak reng rengin uluk taka kut silfai ngei ngei tur a ni a ti a, office chhunga washroom tinah handwash dah a nih thu leh a khat tawka kut silfai reng turin thawktute a chah a ni.

Hei bakah hian I&PR Director chuan mahni inlamah pawh fimkhur a tul thu sawiin chhungkua a kan chenpuite theuh pawh COVID-19 laka kan him theihna tura sawrkarin thuchhuah a siamte uluk taka zawm theuh turin a chah a, a bik taka chhungkua a zirlai, school khar vanga in lama awm tura tih te chu pawn chhuak lo tura veng tur leh inchhunga tawmim tir tura tan la turin a chah a. Chhungkaw member Mizoram pawn atanga lo haw te chu kar hnih chhung tal khung hran (home quarantine/self quarantine) ngei ngei tura hrilhin, ei leh in bakah inthiarna thlengin a hranpa a ruahman a pawimawh tih a sawi a, hetianga ti theilo te tan Health Department hotute hnenah thurawn la a thlen turin a chah bawk a ni. Hei bakah hian chhungkua bakah thenawm khawvengah hritlang, khawsik leh khuh an awmin damdawi lam mithiamte rawn tura hmalakpui thuai turin a chah a, kut thinga inchibai te, chil chhak leh kuhva eina chhak mai mai lo turte leh office chhungah inkawmho a tul a nih pawhin metre khat tala inhlat a awm turin a chah a, social media leh hmun hrang hrang atanga thuthang leng vel vanga chi-ai mai lo tur leh department hotute thu leh hla ngaichang thin tura chahin social media-ah thu belhchiandawllo thehdarh lo turin a chah bawk a ni.