No.707/2019-2020

Vawiin khan Health Minister Dr.R.Lalthangliana chuan ama office chamber-ah chanchinthar lakhawmtu/media hrang hrangte kokhawmin COVID-19 chungchangah state sorkar hmalakna leh thlen chin tawhte a hrilh. Health Minister Press Briefing-ah hian Dr. Z.R.Thiamsanga, MLA & Vice-Chairman, Health & Family Welfare Board; Mizoram Chief Secretary leh Chairman, State Level Task Force on Mitigation of COVID-19 ni bawk Pu Lalnunmawia Chuaungo bakah H&FW Principal Director Dr.F.Lallianhlira leh ZMC-a Asst Prof, Microbiology Department Dr.Gracy Laldinmawii te pawh telin chanchinbumite zawhna hrang hrang an chhang/hrilhfiah a ni.

Health Minister Dr.R.Lalthangliana chuan khawvel puma natna darh mek zel Corona Virus/COVID-19 chu India ramchhung hmun hrang hrangah pawh kai leh thihpui an awm tawh a, Mizoram sorkar pawhin he natna laka inveng tur leh dolet turin theihtawp a chhuah zel thu sawiin sorkar hmalakna leh mipuite hrilhhriat kawngah Media-te nen thawhhona tha tak neih a pawimawh dawn hle a ni, a ti a. Chief Minister zahawm tak hmalaknain BSL-3 Laboratory leh a test-na khawlte siam leh lei tura chak taka hmalak mek a nih thu leh Ministry of Health & Family Welfare (MoHFW) pawhin a test kit chungchangah chak takin hma a la mek a, BSL-3 Lab nei lote tan pawha test awlsam zawk nei thei turin chak takin hma a la mek bawk a ni, a ti. Tuna MoHFW-in test tur a tih ho chu :- 1).COVID-19 hluarna rama kal insawiselna neite, 2).COVID-19 positive damlo bul hnaia khawsa (close contact) leh 3).COVID-19 positive damlo enkawltu damdawiina thawk insawiselna neite an ni a. Hengte chauh hi test tur tih an nih hrih avangin, tun dinhmunah Mizoram-ah chuan test ngai hi an la tam lutuk lova, Test tur Sample-te hi Guwahati leh Kolkata-ah te awlsam taka thawn theih a nih avangin test chungchangah chuan harsatna engmah a la awm lo tih a sawi bawk.

State Level Task Force on Mitigation of COVID-19 leh Health & Family Welfare Department hmalakna zarah hengte hi Mizoram sorkar chuan chak takin a kalpui mek a ni :

1. State Referral Hospital, Falkawn chu State Level Isolation Hospital for Coronavirus atan ruat niin Civil Hospital, Aizawl leh Civil Hospital, Lunglei te chu District Level Isolation Hospital for Aizawl & Lunglei-ah ruat an ni bawk a. District dang zawngah pawh District Hospital-te chu District Level Isolation Hospital-ah ruat vek a ni a. Lengpui CHC-ah Isolation siam niin Lengpui leh Zokhawthar Tourist Lodge-ah te isolation facilities mamawh leh tul ang dah a ni bawk.

2. State Level Task Force on Coronavirus leh District tinah District Level task Force te din a ni.

3. Sorkar laipuia Secretary, MoHFW hovin National Level Video Conferencing neih thin a ni a, Chief Secretary, H&FW Dept. Secretary leh officials dangte an tel.

4. Central Integrated Disease Surveillance Project (IDSP)-in Daily Reporting Format on Coronavirus a duan angin State Surveillance Unit (SSU) chuan nitin Central Surveillance Unit (CSU) hnenah a thawn thin.

5.Ni 6th February, 2020 atang khan Lengpui Airport-ah passenger lo haw zawng zawngte screening neih tan a ni a, vawiin thleng hian ngawrh taka kalpui zel a ni. Ni 17.3.2020 thlengin Lengpui Airport passenger rawn lut screening neih zat tawh chu 17421 a ni. Mizoram rawn luhna hmun dangte - Zokhawthar, Bairabi, Vairengte, Kanhmun, Tlabung (Licheng & Missionary Kai), Thingsai, Bualpui H, New Ngharchhip-ah te pawh state pawn atanga rawn lut turte chu screening neih vek a ni. Ni 17.3.2020 thlenga Lengpui Airport leh heng entry point hrang hranga screening neih tawh zat chu a vaiin mi 38039 an ni.

6. Coronavirus tuar mek ram atanga rawn zin lutte chu dahhran (quarantined) vek niin an dinhmunte uluk taka thlithlai reng a ni a. Tun dinhmunah hian mi 153 te chu quarantined niin IDSP Team ten an vil reng a; mi 8-te chu observation period an zo tawh nghe nghe.

7. Sample 7 thawn thlak zingah 6 chu negative result niin 1 result nghah mek a ni.

8. IDSP Mizoram chuan hmanrua pawimawh leh mamawh tur - 342 Personal Protective Equipment (PPE) Kit, 993 N-95 Mask, 1300 Triple-layer Mask, 415 Viral Transport Medium (VTM), 49 Thermocol box leh 400 surgical glove an stock tawh.

9. Control Room for Coronavirus chu State Surveillance Unit, Directorate of Health Services hnuaia din niin heng 24x7 Helpline Numbers - 102 (Toll Free) / 0389-2323336 / 0389-2322336 / 0389-2318336 dah a ni bawk.

Mizoram sorkar chuan Coronavirus laka mipuite him dan tur ngaihtuahin meeting pawimawh vawi tam tak leh a tul ang zelin a nei thin a. Naktuk ni 19.3.2020 (Ningani) khian Chief Minister hovin COVID-19 chungchangah a bik takin Cabinet Meeting neih tum a ni.