Vawiin chawhma khan Information & Public Relations Minister Pu Lalruatkima chuan Nagaland Press Tour a kal turte I&PR Department Office kawtah a vai liam.

Information & Public Relations Minister Pu Lalruatkima chuan I&PR Director Office-ah thu sawiin, sawrkar hmalaknaa Press Tour, I&PR Department kaltlanga buatsaih a nih chu lawmawm a ti a, hmasawnna leh ngaihtuahna thar nei tur chuan hmundang, ramdang kan zin a ngai a ni, a ti a. India hmarchhak zingah chuan Nagaland leh Mizoram hi inang tak niin, a mi chengte nen pawh inkawmngaih leh inlungrual kan ni, tiin a sawi a. Nagaland Press Tour-a Journalist thlanchhuahte leh sawrkar aiawha kalte chu mipui hnena puan chhuah tur leh mipui zirtirna kawnga hriatna rawn hawn turin a chah a. Journalist te hi mipuite tana rawngbawltu leh mipuite zirtirtu an nih avangin, thawhhona tha a pawimawh a ni, tiin a sawi a. Sawrkar leh Media inkar a hlat chuan ram hmasawnna in a tuar thin a ni, a ti a. Minister chuan Journalist Welfare Board pawh dinin, member turte ruat anih hunah, journalist te harsatna tawh mek te sut kian nan ruahmanna siam a ni ang, a ti a. I&PR Department kaltlangin Contemporary Painting Exhibition, New Delhi-ah February thla hian buatsaih a ni ang, a ti bawk a ni. Nagaland Press Tour-a kaltur te chu Pathian awmpuinaa tluang taka kalturin duhsakna a hlan a ni.

Mizoram Journalist President Pu Zonunsanga Khiangte pawhin Press Tour-a kalturte chu hlimtak leh tluang taka kalturin duhsakna a hlan a. Mizoram leh Nagaland Media kalphung khaikhinna tha nei turin leh article ngaihnawm tak hawn teuh turin a fuih bawk a ni.

Nagaland Press Tour ah hian Pi K.Lalliandingi, Aizawl DIPRO chu Team Leader a ni a, Pu C. Lalhruaitluanga, Lawngtlai DIPRO chu Asst. Team Leader a ni. Nagaland Press Tour hi Tour hmasa ber niin, Journalist 10 an kal a, tour a kalte hi 3rd February-ah Aizawl an lo let ang.

Press Tour-ah hian Team Pali awmin, India hmarchhak state pathum Nagaland, Meghalaya, Sikkim leh West Bengal-ah te tour neih tur a ni.