Principal College of Teacher Education chuan an zirna In College of Teacher Education ni thin chu Institue of Advance Study in Education a hlangkai a nih chungchangah a hnuai ami ang hian thuchhuah a siam. College of Teacher Education (CTE) chu, Ministry of Human Resource Development (MRHD) hnuaia Teacher Education Approval Board (TEAB) chuan, Institute of Advance Study in Education (IASE) ah September 2005 ah khan a lo hlangkai tawh a. A taka chantir erawh chu a kalkawng a thui a. A hmun hma leh facilities leh a thawktute chungchangah Norms leh Specifications khirh tak tak tlin ngei a ngai a. Chung zawng zawng chu hlen chhuak in, tunah hian Mizoram ah zirna sang changtlun tak IASE a lo ding ta a. Hmasawnna rahbi thar tak meuh a ni. India ram State dang tam tak IASE neilo an awm laia, North East India a pathum awm zinga pakhat ni ve ta hi a lawmawm takzet mai. District 20 (sawmhnih) zelah IASE 1 (pakhat) nei theih chauh a ni a, Mizoram tan CTE pakhat chauh a neih avanga IASE phalsak an ni.

M.Ed zir theihna turin National Council for Teacher Education (NCTE) phalna, Letter of Formal Recognition chu ni 12 March, 2012 khan hmuh a lo ni tawh a. Mizoram University atangin Provisional Affiliation ni 11 June, 2012 khan hmuh a ni tawh bawk a. IASE hian CTE hna a keng kawh chhunzawm tho ang a, B.Ed. Regular Programme chu a ngaia kal reng thovin, M.Ed. Course hi 1st August, 2012 atanga tan tur a ni a. A remchan hunah M.Phil leh Ph.D. zirna pawh hawn chhoh zel tum a ni bawk.

B. Ed leh M.Ed Course, M. Phil leh Ph.D in Education bakah IASE hmalakna tura bithliah chu hengte hi an ni : 1. Teacher Educators (Elementary & Secondary Teacher Training-a thawkte) tana inbuatsaihna leh intuaitharna programmes kenkawh.

2. NCFTE & NCF tumte tihlawhtling ngei tura zirtirtu training-na vawn that.

3. Quality Education nei tura Research lama tan lak.

4. Secondary School-ah zirtirna tha zirtirtuten an pek theihna tur atana teaching materials tha buatsaih.

5. DIET te hmasawnna tur duan leh kawng buatsaih sak.

6. Zirna sang hrang hrang leh SCERT leh DIET te nena thawhhona leh inthlun zawmna mumal tak siam.

7. RMSA Programme hnuaia zirtirtute tana In-service training buatsaih leh he scheme hnuaia hmalakna hrang hrang neihte enfiah leh chhuina neih (Monitoring Agency).

8. Teacher Education-a Technology thiamna chhawrbawk kawnga tan lak.

Education Minister leh Parliamentary Secretary, Education te thahnemngaihna leh theihtawp chhuahna a fakawm takzet a. State thenkhata IASEs chu sorkar ngaihsak loh vanga hlawhchham ta te an awm a. Mizoram a IASE hian a nihna dik tak, fawmkim leh ziktluak tak dinhmun a luah zawh ngeina tura Mizoram sorkar ngaihsakna leh insenso a ngaihna laia insengsova theihtawp chhuah ngei turin Mizoram University leh NCTE pawhin an duh thu an sawi.

IASE chungchang zau zawka hre duh te an awm chuan, Phone No. 2322211 leh 2310565 ah zawh theih reng a ni e.