Olympic din champhaphak hriatrengna, International Olympic Day Run khawvel puma vawiina hman chu Aizawlah pawh tukin zing khan hman ve a ni a. Sports discipline hrang hrang atangin infiammi thahnem takin Chanmari, Kulikawn leh Vaivakawn atangtea tlanin, Lammualah tukin zing dar 7 khan an intawkkhawm a ni.

Lammuala intawhkhawmnaah Mizoram State Olympic Association President Pu Lal Thanhawla, Chief Minister chuan Olympic Day Runa thalai infiammi, Aizawl hmun hran hran atanga kalkhawmte chu chibai bukin, an chungah lawmthu a sawi a. Sports discipline hrang hranga hmasawnna hmuh tur a awm chu a lawmawm tak zet a ni a ti a. Thalai infiammite chu sorkarin mi hlawhtling tak ni tura chherchhuah a tum reng a ni a ti.

Lammuala astro turf phah chu rim taka hman anih avangin a tlo loh phah mai ang tih a hlauhawm a ni a ti a. Chuvangin a khuhna tur Rs.50 lakhs chuang man kan nei tawh a ni a ti a. Chief Minister chuan sports discipline hrang hrangte mamawh nei turin sorkar chuan a ngaihtuah mek a ni tiin, Diving leh Swimming pool siam tum a ni a ti bawk.

Mizoram State Olympic Association Vice President Pu Zodintluanga, Sports Minister chuan sorkarin thalaite tana hmalakna tam tak a neih tawhah thalaite ten lawmna chang hre tura a duhthu a sawi bawk.

Vawiin Olympic Day Run a Sports Association hrang hrangte hnenah lawmman tangka fai Chief Minister hian a hlan a. Olympic Day Runa vawi 4 a zawna tlan tam ber nihna la tu, vawiina mi 252 telna Mizoram Taekwondo Association chuan Rs.6,000/- an dawng a ni.