Vawiin khan Raj Bhawan-ah  Governor Kummanam Rajasekharan  chuan Archaeological Survey of India(ASI) hotute leh INTACH Mizoram Chapter hruaitute a kawm a. He hunah hian Governor chuan  ASI leh INTACH hotute chu Vangchhia hmun a Heritage Site chungchang  leh  hmalakna kal mek  te  a sawipui a ni.

Governor Kummanam Rajasekharan  hnenah ASI leh INTACH thawhhona te bakah  Vangchhia  hmuna ASI hnathawhte a lem nena  sawifiahna hun,  Dr Sujeet Jain, Dy.Supdt Archaeologist, Aizawl Circle chuan a hmanga. Archaeologist te zirna atang chuan  Vangchhia khaw bula Heritage site ang te chu  Mizoram hmun tam takah a awm a rinawn hle tih Dr Sujeet chuan a sawi a. Hma la thei tur leh sulhnu hlui haichhuak tur  erawh chuan Mizoram hmun thenkhat chu project site anga puan a ngai hmasa a ni a ti. Chhui chianna hrang hrang atangin Vangchhe hmuna hnuhma leh bungraw hmuchhuahte chu  Mizo thlahtute  sulhnuah bak ngaihruat theih a la ni rih lo a ti a. An thil hmuchhuah te  upat zawng pawh  hmun hnihah chhut chhuah tir a nih thu a sawi a. A chhutna hmun  pakhat zawk,  Florida a zirchianna ang chuan AD 1400 bawr vel a chhut a ni a. Mihring an awm tan hun erawh chu AD 600 vel anga rin a ni a, chhui chian erawh a la ni lo a, finfiahna pawh a la awm thei rih lo a ni a ti.

INTACH Mizoram Chapter hruaitute -  Pu P. Rohmingthanga leh Pu C. Chawngkunga te chuan Mizo te tobul nia an hriatte leh midang dang sawi dan te Governor hnenah sawiin Heritage site chu Mizo pi leh pute sulhnu hlui a nih thu an sawi a. Heritage site atan puan theih khaw dang pali - Farkawn, Dungtlang, Lianpui leh Lungphunlian te chu Heritage site a puan a nih thuai theih nan Governor chu hmalak sak turin an sawm a ni. INTACH hruaitute chuan Mizo pi leh pute thangthar te hnenah ziakin thu an hnuchhiah loh avangin heng pipute sulhnu te hi Mizo History chhui chian nan atangkai bakah humhalh ngai anih thu Governor hnenah hian an sawi a. A hun neih rem chan hmasa berah  Vangchhia leh a chhehvel hmun te tlawh turin Governor chu an sawm bawk a ni.