Vawiin hi World Environment Day a ni a, Aizawl-ah chuan Assembly Annexe-ah INTACH, Mizoram Chapter leh Environment & Forest Department huaihawtin he ni puala inkhawm neih a ni.a; Parliamentary Secretary Lt. Col (Retd) ZS Zuala chu khuallian a ni.

Lt. Col. ZS Zuala chuan, “Kumin World Environment Day thupui atana ‘I ei leh in tur thlang fimkhur la, renchem ang che’ tih thlan a ni chu Mizo mipuite tan a pawimawh hle a; balance diet lam ngai pawimawh lova kan tui tih zawng kan ei chiam thin hi a hrisel lo a. Chutiang bawkin, ei leh in renchem lova kan tibang teuh teuh thin pawh hi sim a tul a ni” a ti. Lt. Col. ZS Zuala chuan kan tuihna leh lui humhalh a, vawn thianghlim chu mitin mawhphurhna a nih thu sawiin, “Aizawl khawpui thli zawng zawng luan khawmna Tlawng lui hi kan ei ber a ni a, kan vawn thianghlim a tul em em a. Luia nungchate tura hrai chingte hi kan hnam hmelmate an ni” a ti bawk. NLUP chu environment humhalhna atana thil tangkai tak, tlangram lo neih bansanna tura ruahman a nih avangin a hlawhtlinna atana theih tawp chhuah theuh chu ram tana thil pawimawh tak a nih thu Parliamentary Secretary chuan a sawi bawk.

Vawiina World Environment Day-ah hian INTACH, New Delhi-in school naupangte tana essay inziahsiak a buatsaih a ram pum huap leh hmar-chhak bial huapa lawman dawngtute hnenah trophy leh certificate bakah, pawisa hlan an ni a. Lawmman dawngtute chu – Althea ZH Kimi, St Pauls HSS te, Mimi C. Rinpuii, Gospel Centenary School te, Rosangliana, Synod HSS te, Vanlalparmawii, Modern English School te, R. Vanlalzara, Gospel Centenary School te, Lalramzawni, Serkawn Baptists HSS te, Lucy Lalthakimi, Helen Lowry HSS te, Grace Ch. Ralte, Govt. Chaltlang HSS te an ni.

He inkhawm hi Pu JL Singh, PCCF chuan a kaihruai a; INTACH, Mizoram Chapter aiawhin General Secretary Pu Thanseia leh Covener Pu P. Rohmingthanga ten thuchah an sawi bawk a ni.