Sericulture Training Institute Zemabawk-a Sericulture hmasawnna ruhrel pawimawh tak tak pathum, Grainage building, Cold storage Plant leh Solar Power plant te chu nimin khan Finance Minister Pu H.Liansailova, NLUP Nodal Minister ni bawk chuan a hawng.

NLUP sum nuai 37.26 senga sak Grainage building atang hian tum khatah pangngang chi 1,50,000 lai siam chhuah theih a ni a. NLUP kalpui hma a farmers te mamawh 2.5% awrh tum thei thin kha he Grainage avang hian Sericulture department chuan farmer te mamawh za zela 60% lai a tum thei tawh dawn a ni. Cocoon dah thatna Cold storage hi NLUP sum vek nuai 17.08 hmanga sak niin hemi chawm tur Solar Power Plant (25 kWp) chu Zoram Energy Development Agency (ZEDA) kaltlangin central sorkar Ministry of New and Renewable Energy atanga 90% subsidy leh NLUP sum nuai 6.7 senga siam a ni a. Cold storage bakah helai sericulture complex power mamawh pawh a phuhru thei nghal a ni.

Hawnna inkhawmah thu sawiin Pu Liansailova chuan NLUP hian kawng hrang hrangin Mizoram tan malsawmna a thlen a ni, a ti a. Heng hmasawnna ruhrel hawn thar te hi NLUP beneficiary te chauh ni lovin sericulture eizawnna hna thawktu zawng zawng tana chhenfakawm leh ram pum tana ro tling an ni, a ti a. NLUP hnuaiah Agriculture atana sum dah hnem avangin Mizoram-in a la dawn ngai loh RKVY sum vaibelchhe 200 chuang nikumah a dawng a, kuminah vaibelchhe 150 central sorkar chuan min dahsak leh tawh bawk a ni, a ti a. NLUP sum hmangin hmasawnna ruhrel pawimawh tak tak din chhoh zel a ni a, NLUP chu special pacakage aia tha in state sorkar thuneihna hnuaia kalpui turin central sorkar-in state plan ah min khung sak a, sorkar hnathawk hlawh atana pawh hek chu sawi loh, NLUP sum avang hian sorkar hnathawkte pawhin hlawh an lak theih phah thin zawk a ni, a ti a. NLUP model ang hi hel hluarna state thenkhatah hmang ve turin central sorkar chuan ngaihtuahna a hmang mek tih a tarlang.

Pu Liansailova chuan ram hmasawnna tur atana lungthu pawimawh pathum te chu hmathlir(vision)neih that, hmalak dan tur(strategy) duan thiam leh a thawh dan tur ruahmanna(action plan)fel tak neih a ni tiin heng thil pathum te hi sorkar dinglai in a hnathawh a kalpui dan a ni, a ti a. Rorelna tha a awm theih nan NGO hrang hrang te an duhtui em em tawh tih sawiin sorkar pawh result-framework dungzuiin a kal zel tawh dawn a ni, a ti.

Pu Nihar Kanti, Sericulture changtu Minister pawhin thu sawiin Sericulture Research Institute dinna tur dil mek a ni tih a sawi a. Sericulture hmasawnna tura NLUP hnuaia hmalakna tam tak avangin lawmthu a sawi bawk. NLUP Implementing Board Vice Chairman Pu P.L.Thanga chuan NLUP kalpui hnuah sericulture farmer chu mi 3000 atangin 7000 velah an pung tih a sawi a. Khawvela silk man to ber chi, Muga variety chu sik leh sa inthlak danglam nasat avangin khawvela a dek chhuaktu lian ber Assam in harsatna a tawk a, Central Silk Board nena thawk hovin Mizorama enchhinna experimental farm neih ah hlawhtling taka khawi theih ani tih chian a ni a, Mizoram tan world record siam theihna remchang a ni, a ti.

NLUP hnuaia hmalak a nih hnu hian department chuan pangngang chi hi vaibelchhe 18 a sem chhuak thei tawh a, kum 2013 ah chuan vaibelchhe 20 ah a kai chho thei dawn a. NLUP hmalak tan tirha thingtheihmu atanga cocoon thar 15,296.39 kg chu nikum 2012-13 khan 34,818.42 kg ah a kai chho ta bawk a ni.

Sericulture hmasawnna ruhrel pawimawhte hawnna inkhawm hi Pu C.Lalthankhuma, Secretary, Sericulture Departmetn etc in a kaihruai a.Pu Donatus Engzananga, Director Sericultre chuan report pe in Pu Lalrozama, Principal, Sericulture Training Institute inlawmthu sawiin hun hnung a khar a ni.