Vawiin khan Principal Directorate of Health Services Conference Hall, Dinthar, Aizawl-ah Integrated Disease Surveillance Programme (IDSP) Medical Officers, Staff Nurse leh Pharmacists te tan ni khat awh training chu hlawhtling taka neih a ni a, he hun hi Dr. K.Ropari, Principal Director, Health & Family Welfare Department-in a hmanpui.

He Training hi Session hnih-a then a ni a. Then khatna hi Dr. Pachuau Lalmalsawma, State Nodal Officer, IDSP in a kaihruai a. R.Lalthatluanga, DEO, SSU in Pathian hnena inhlanna hun a hmangin Dr.K.Ropari'n Welcome Address a sawi bakah Dr. Pachuau Lalmalsawma hnen atangin Hospital-based disease Surveillance leh Emerging and Re-emerging Zoonotic Disease chungchang sawifiahna hun a hmang a. Lalfakzuala Pautu Entomologist, IDSP hnen atangin Scrub typhus chungchang ngaihthlak a ni bawk.

Dr.K.Ropari chuan IDSP-te chu natna leh hrileng zawn chhuah kawngah te, natna chi thar zirchianna-ah hmalatu ber an nih avanga an pawimawh zia a sawi a. An huam chin a zauh avanga Medical Officer, Staff Nurse te leh Pharmacist ten thawhhona tha an mamawh zual thu a tarlangin nasa lehzuala tan la turin a fuih a. Mamawh an neihna kawngah theihtawp chhuahpui an inhuam reng a ni tih a sawi lang tel bawk.

Integrated Disease Surveillance Programme (IDSP) hi April ni 5, 2005 khan Central sawrkar nen MoU sign in Mizoram-ah bul tan a ni a. Surveillance Committee hi Mizoram District 8-ah din a ni a. An hnuaiah hian Malaria, Cholera, Typhoid, TB, Measles, Polio, Plague, Menigoencephalitis ah te Regular Surveillance neih thin a ni a. Tin, HIV/HBV/HCV, Water Quality, Outdoor Quality ah te Sentinel Surveillance neih thin a nih bakah Natna dang tam takah Regular Periodic Surveillance neih thin a ni bawk.

IDSP hian Mizoram puma hrileng zawng zawngte kimchang takin Central-ah kar tin report a pe thin a. Hrileng leh epidemic a awm reng rengin a zirchiang turin Rapid Response Team a tir chhuak vat thin a ni.

He Training-ah hian ranvulh, ramsa leh rannung atanga natna lo chhuak thar zelah AH & Vety Deptt. leh a kaihhnawih department dangte nena thawhho a tulzia pawh uar taka sawi ho a ni. Natna chi hrang 1709 zinga za zela 60 te hi Zoonotic Disease an tih ran leh ransa atanga kai theih a nih avangin hemi kawnga tanlak a pawimawh zia te zirho a ni bawk.