2127/2024-2025

Dated Hnahthial the 19th September, 2024: District Aids Prevention & Control Committee, Hnahthial district buatsaihin Horeb Lodge Conference Hall-ah vawiin khan Intensified IEC Campaign - India Fight Against HIV&STI pualin Hnahthial District-ah Debate competition huaihawt a ni.

Chief Medical Officer, Dr R. Lalsanglura chuan he hunah hian thu sawiin central lam atang HIV/AIDS leh STI ngai pawimawh a he campaign huaihawt a ni chu lawmawm a tih thu a sawi a. Hemi puala debate competition ngai pawimawha zirlai rawn kal khawm zawng zawngte hnenah lawmthu a sawi bawk a ni. HIV/AIDS kai theih dan leh STI chungchang zirlai kalkhawmte hnenah zirtirna tawi neiin zirlaite chu heng natna kai lo turin tun atanga an fimkur a tul thu a sawi a. Reilote nawm nana damchhung hun tichhe lo tura chahin kan Zoram hma hun an ni tih hre reng chungin tun atang mipat hmeichhiatna leh drugs lakah fimkhur theuh turin a chah nghal bawk a ni.

He HIV/AIDS campaign puala debate buatsaihah hian FD HSS, St. Stephen's School, Govt. Southern High School leh Govt. HSS atang zirlai pahnih theuh telin Govt. Hnahthial College atang zirlai pariat an tel a. He debate judge atan Pu Malsawmtluanga Fanchun, Project Director; Pu FC Zonghinga, SDPO leh Pu B. Lalremsanga, Secretary, YMA sub HQ te chu hman an ni.

High School debate topic atan "Vaihlo leh a kaihhnawih hman chin hian drugs hmansual na a thlen thei" tih chu thlan niin result puan nghal a ni a.

1st Prize: Lalhriathlui, Govt. HS
2nd Prize: Vanlalhruaidiki, St. Stephen's School
3rd Prize: C. Lalzawmpuii, Govt. Southern High school

Higher Secondary School debate topic atan "Inchiuna hriau sem hian hriau thianghlima inchiu chu a pawi lo anga lantirin, drugs hmansualna a tihluar " tih chu thlan niin result puan a ni bawk.

1st Prize: Lalhruaizela, FD HSS
2nd Prize: Lalramdinpuia, Govt. HSS
3rd Prize: Lalremruati Hauhnar, Govt. HSS

College debate topic atan "Condom hman inzirtirna hian STI/HIV darh zel tur venna ai mahin kawppui te laka rinawmlohna leh kum naupang zawkteah mipat hmeichhiat hmanna a tihluar. " tuh chu thlan niin result puan nghak a ni bawk.

1st Prize: C. Rodingliana, Govt. Hnahthial College
2nd Prize: Vanlalrinchhani, Govt. Hnahthial College
3rd Prize: Vanlalhmangaiha, Govt. Hnahthial College

Intensified IEC Campaign - India Fight Against HIV&STI pualin Hnahthial District-ah September ni 26 hian Flash Mob dance leh Short Drama competition neih tura ruahman niin September ni 27 hian Quiz competition buatsaih a ni bawk ang.