2128/2024-2025

Champhai, 19th September 2024: Vawiin khan District Child Protection Unit chuan Champhai District chhunga naupang venhimna kawnga thawktute tan Capacity Building on Acts Related to Children chu DC Conference Hall, Keifangtlangah an buatsaih a. He hunah hian naupang venhimna kaihhnawih dan hrang hrang te zirho a ni a. Pu K. Zorammuana, Addl DC chuan khuallian niin a hmanpui.

Khuallian Pu K. Zorammuana chuan he hunah hian thu sawiin naupangte venhim chu khawvel pawhin a ngaihpawimawh thil a ni, a ti a. Naupang ten an dikna chanvo an chan theih nan United Nations pawhin UN Convention on the Rights of the Child a siam thu te, India ram pawhin naupang venhimna dan tha tak tak a neih thu te a tarlang a. Naupang ten nun pangai tak an neih theih nan an seilenna boruak a pawimawh tak zet a, he mi kawngah hian mitinin mawhphurhna an nei a ni, a ti.

Addl DC chuan naupang venhim kawngah tlawmngai pawl te hnathawh chu a fakawm a tih thu sawiin, mipui leh sawrkar inkara palai hna an thawhna chuan mipui zirtir kawngah leh khawtlang siamthatna kawngah rah tha a chhuah a ni, a ti a.  Tunlai thiamna sang zelah naupangte venhim a pawimawh zual a, internet kaltlanga zirtirna tha lo an dawn tur te ven pui a, chhungkua atanga tan lak tlan a ngai a ni, a ti. Pu K. Zorammuana chuan naupang vanduaina tawk te pawhin thawh chhuahna hun tha an neih theih nan hriatthiamna nen a enkawl turin kalkhawmte chu a chah a. Champhai District-a naupang enkawlna hmun (Child Care Institutions) te inenkawlna chu tha thawkhat a a hriat thu a sawi a, hmasawnna nei zel turin duhsakna a hlan a ni.

He hun hi Pu Lalmalsawma Hnamte, Addl SP chuan kaihruaiin kalkhawmte lawmna thu a sawi a. Chawhma hunah hian Pu Vanlalruata, 1st Class Judicial Magistrate chuan Juvenile Justice (Care & Protection Act) hnuaia Special Juvenile Police Unit (SJPU), Juvenile Justice Board (JJB) leh Child Welfare Committee (CWC) te mawhphurhna hrang hrang a sawi a. Pi R. Lalrinchhani, DCPO chuan Mission Vatsalya chungchang sawiin, Pi J. Lalruatlawki, Legal Officer, DCPU hnen atangin JJ Act hnuaia Documentation leh Forms hrang hrang ziah dan te ngaihthlak a ni bawk.

Chawhnu hunah hian Pu Vincent Vanlalruata, Addl. District & Sessions Judge, Champhai chuan POCSO Act chungchang ziritirna a pe a. Pu T Saikunga, Presiding Officer, Fast Track Special Court chuan naupang venhimna kawnga dan awm hrang hrang te a sawifiah bawk a ni.

He hunah hian Champhai District chhunga naupang venhimna kawnga thawktu hrang hrang – Champhai District Executive Force hnuaia Police Station pathum (Champhai, Zokhawthar leh Dungtlang) a thawktute bakah Excise & Narcotics Department leh Child Care Institutions enkawltute an tel a. Naupang venhimna kaihhnawihah zawhna leh chhanna hun bakah sawihona hun hlawkthlak tak hman a ni.