2129/2024-2025

2024 Mimkut thla ni 19: India ram puma chawlhkar hnih chhung awh tur faina beihpui thlak, Swachhata Hi Seva 2024 kalpui mekah vawiin khan Urban Development & Poverty Alleviation (UD&PA) Department, Lunglei leh Young Mizo Association (YMA) Lunglei Rahsi Veng Branch leh Lunglei District Adventure Club te ṭang ho chuan Lunglei Rahsi Veng leh Sazaikawn inkar kawngpui thlanga bawlhhlawh paihna hmun ni lova bawlhhlawh paihte an thian fai.

Rahsi Veng leh Saizaikawn inkara a paihna hmun ni lova bawlhhlawh paih (Rahsi Veng CTU) then fai hi Swachhata Hi Seva 2024 puala District Steering Committee-in Lunglei khawpui huam chhung (urban area)-a vantlang hmunhma then fai ngai bik [cleanliness target unit (CTU)] a ruahman pariat zinga pakhat a ni a. Hma lakna tur ruahmanna (action plan) duan sa angin Lunglei District Urban Development Officer (DUDO) Pu C. Sawihlira hovin vawiin khan Rahsi Veng CTU then fai hnatlang hi thawh a ni a. UD&PA Lungleia thawktute, Rahsi Veng Branch YMA member-te leh LDAC member-te aṭangin mi 60 chuang an thawk chhuak a ni.

Lunglei khawpui chhungah Lunglei Municipal Council (LMC) chuan veng parukah bawlhhlawh khawnin, a bak veng dangah chuan Local Council-te ruahmannain bawlhhlawh khawn hi kalpui a ni a. Hetih lai hian mahni veng chhung bawlhhlawh paih ruala paih lo, a hranpaa mahni remchan dana bawlhhlawh paih leh khualzin veivak lirthei aṭanga bawlhhlawh paih mai ṭhin an la awm avangin bawlhhlawh paihna hmun ni lova bawlhhlawh paih hmuh tur mit tikham tak tak eng emaw zat a la awm a. UD&PA chuan he'ng hi a remchan dan anga thian fai turin ruahmanna siamin, tun Swachhata Hi Seva kalpui mekah pawh hian he'ng a paihna hmun ni lova bawlhhlawh paihte hi then fai mek zel a ni a. Mahnia bawlhhlawh paih ṭhinte pawhin bawlhhlawh paihna hmun ni lova paih mai mai lo va, thuneitute'n Hauruang kawng, Riangvai Thlanmual bula a paihna hmun tura an ruahman (dumping ground)-ah chauh paih ṭhin turin department chuan mipuite an ngen a ni.

Swachhata Hi Seva 2024 kalpui mekah hian UD&PA Lunglei leh LMC ṭang kawp huaihawtin September ni 17, 2024 khan Lunglei khawpui chhunga Local Council tinin khawtlang hnatlangpui (Shramdaan) kovin, veng chhung then fai hnatlang an lo thawk tawh a. Nimin September ni 18, 2024 khan UD&PA leh Baptist HSS NSS te chuan Lunglei Zotlang CTU-ah kawng dunga bawlhhlawh then fai hnatlang an lo thawk tawh bawk.

Attachment

  • Loading attachment...