Meeting-ah hian agenda pasarih chhawpchhuah a ni a. A hun taka inziaklut lo, tlai khaw hnua birth certificate leh death certificate dil thar leh te hnena Non - Availability Certificate pek chhuah chungchangah inbumna leh thuneitute hnena diklo taka certificate lakchhuah tum te an awm thin avangin a inven dan tur vawiinah hian sawiho a ni a. A bik takin ro khawm leh pension lak thuah a pawimawh em avangin death certificate lakchhuah diltute lakah fimkhur lehzuala thil kalpui a tul nia hriain meeting chuan mitthi tawhte chhung hnai ngei an nihzia tilang thei turin tihdan phung pangngaia an phut thin piah lamah finfiahna document tha tawk tak phut zel ni se, tiin an rel.
Birth Certificate mumal taka nei si, office register-a hming lang si lo chinfel dan tur chungchang te; nu leh pa hming emaw mahni hming emaw thlak duh te lakah finfiahna documentary proof eng ang chin nge pawm tur tih te; kum upa tawh, kum sawmruk (60) chunglam te mahni ngei kal kher ngai lo va ngaihnathiam chungchang te; birth leh death certificate print chhuah nana tuna hman lai mek aia lehkhapuan quality tha zawk hman chungchangte; certificate lem nia ngaih vawi tam tak department-a complain lut tawh thin te leh thil pawimawh dangte vawiin meeting-ah hian an rel a ni.
Inter-Departmental Coordination Committee (IDCC) thutkhawm hi kum tin neih thin niin tun tum hi an vawi 17 thutkhawmna a ni a. Meeting hmasaa an thurel bawhzui dan report ngaihthlak a ni a, District tin atangin nau piang leh mitthi registration chungchanga an hmalak dan, harsatna an tawh te leh hma an sawn dan report ngaihthlak a ni bawk. Meeting kaihruaitu Economics and Statistics Director Pu Lalchhuanawma Hrahsel chuan Birth and Death Registration-ah Mizoram chu India rama ti tha ber te zing ami an nih thu a sawi a ni.
