Vawiin khan Minister of State Pu Lal Thanzara hovin Chief Minister Conference Hall-ah Inter Departmental Media Coordination Committee chuan an meeting hmasa ber an nei. He hunah hian Department hrang hrang atangin officer pawimawhte an tel a ni.

Minister Pu Lal Thanzara chuan meeting sawihawnna hun hmangin, sorkar chu mipuite rawngbawltu a nih angin Department-te hmalakna hrang hrang puanzar chu thil pawimawh tak a nih thu leh, langtlang sorkar siamna hmanraw tangkai tak a nih thu a sawi a. Media darhzau leh chak tak hmang hian hmun hla ber a awmte pawhin an hamthatna tura sorkar hmalaknate an lo hriat a, mitinin an chanvo an hriatchian theih nan Sorkar department-te chu an tanrual a tul thu a sawi a ni.

Vawiin meeting hian a tum ber chu sorkar department hrang hrang hnuaia hmalaknate mipui hriata puanzar kawnga department-te inkar thawhhona tha zawk neih theih dan tur ruahman a ni a. Department hrang hrang hnuaia project kalpui mekte a hmuna tlawhte, leh mipui hrilhhriatna programme hrang hrang – seminar-te, radio leh TV-a talk show neih te bakah thil dangte rel a ni.