Mamit Officer Club ten an buatsaih Mamit khawpui chhunga Sorkar Department hrang hrangte in pawhna tha zawk leh thawhhona tha zawk a awm theihna tur atana buatsaih Inter Departmental Sport chu tukin zingkar khan Pi Lalbiaksangi, District Bawrhsap chuan a hawng.

Pi Biaksangi chuan Mamit khawpui chhunga Sorkar Department hrang hranga thawkte chu inlungrual tak leh hmasawnna hna thawhna kawngah pawh inpawh tlang taka kan kal theih nan sport hi buatsaih a nih thu leh kan taksa a hrisel loh chuan kan nitin hna kan thawhna kawngah pawh kan thuanawp thin a, chuvang chuan taksa insawizawi hi hriselna atan thil pawimawh tak a ni a ti, Department hrang hrang atanga tel chu rilru thianghlim tak pu a inelna nei turin a chah a ni.

MOC tena Sport an buatsaih chhung hian Sorkar Department hrang hrangte chu mipuite tana dawr theih reng tur leh hna khaihlak lo tura ruahmanna kalpui a ni a, zingkar leh tlai dar 3 hnu lamah infiamna hrang hrang hi neih thin a ni ang.

Mamit Officer Club tena Inter Departmental Sport an buatsaih hi ni 30 June a zawh tura ruahman a ni a, Department hrang hrang 39 telin Group riat-ah inthen a ni a, infiamna chi hrang hrang 13 hmangin inelna neih thin a ni ang.Tukin Sports hun hawnnaah hian Mipa leh Hmeichhia marathon race neih niin hetah hian Lalchhandama Purple House leh Elizabeth Lalmalsawmi Green House te chu pakhatna an ni.