Mizoram sawrkara Rural Development department chuan nihnih awh tur thingtlang hmasawnna tura an hmalakna chi hrang hrang te thirletna "Review Meeting" chu vawiin chawhma dar 10:30 atang khan Aijal Club Conference Hall, ah Rural Development Minister Pu R.Lalzirliana kaihhruaiin an nei a, he hun hi Lt. Col. Z.S. Zuala, Parliamentary Secretary for Rural Development pawhin telpuiin he review meeting-ah hian Mizoram huapa Rural Development department hnuaia thawktu hrang hrang "Group A" chin koh khawm vek an ni.

 

Meeting Chairman Pu R.Lalzirliana chuan Rural Development department hotuten thingtlang mite dinhmun chawikan leh tihhmasawnna tura ruahmanna chi hrang hrang an neih te kalpui anih dan thlirhova, hmalam kan pan theihna tur atana kawng tangkai tur dap tura ruahmanna tha tak an siam hi thil lawmawm leh chhinchhiahtlak a ni a ti a, zirhona leh sawihona hun te an neih hunah pawh Mizoram hmasawnna tur thil dahpawimawh hmasa ber chunga rilru zau tak pu tlang tura kalkhawmte chahin an hnathawhnaah p[hur tak leh thahnemngai taka theihtawp chhuah zel turin a fuih a ni.

 

Rural Development Secretary Pu Lalhmingthanga pawhin Rural Development department chu thingtlang hmasawnna tur kawnga hma la nasa bertu an nih thu sawiin Sawrkar Laipui pawhin mawhphurhna tam tak a pe a, hetih rual hian an duhtuiin min vil uluk sawt tawh hle a, keini pawhin hna kan thawhna ah fimkhur tak leh uluk taka kan thawh a ngai lehzual tawh a, tun dinhmunah Mizoram chu India ram State hrang hrangte zingah Rural Scheme kalpui tha te zinga chhiar an la nih thu leh tha lehzuala thawk tura tan la thar sauh sauh turin officer kalkhawmte a chah a, open-defecation free state ni turin Sikkim dawttu nih tum tur leh "Housing For All by 2020" tihlawhtling hmasa ber State ni tura Sawrkar laipui thuneituten Mizoram an beiseina chu tihhlawhtlin tum ngei turin a fuih bawk a ni.

 

Vawiinah hian mithiamte paper buatsaih chi hrang hrang ngaihthlak ho niin sawihona hun hman zel a ni a, Pu Paul L. Khuma, Under Secretary, RD Department in "Rural Development Department on Labour Budget, Commitment of  Works and Master Circular etc." thupui hmangin paper a present a, Pi C. Laltleipuii, BDO, East Lungdar-in "Innovative Practices and Way Forward under MGNREGA (A Block perspective" thupui hmangin paper a present bawk a, Pu Lalchhanhima, BDO, Lungsen hnen atang "Good Practices under variuos Rural Development Schemes (A Block perspective) ngaihthlak niin Pu CC Lalchuangkima, Project Director, DRDA, Champhai District hnen atang "Commitment as per the Labour Budget-A District perspective" ngaihthlak a ni bawk.

 

Rural Development department hian Centrally-sponsored Scheme chi hrang hrang MGNREGS, IAY, BADP, IWMP, SRLM, SAU etc. a enkawl a, heng scheme hrang hrang kaltlanga State, District leh Block level a hmalak tawhna te leh hmalak chhunzawm dan tura rawtna te he review meetingah hian sawiho a ni.