Pu Hmingdailova Khiangte, Parliamentary Secretary leh Tuirial bialtu MLA nibawk chuan vawiin khan Kawnpui leh Hortoki inkar kawng a tlawh a, heilai kawng leh a chhehvel siam dan a hmunah ngei a enfiah nghal. Hnathawh theih hun chhung thla 7 chhunga hna an thawh mumal loh avangin Fur ruahtui tla in kawng a tichhe nasa tawh a; hetianga kawng a chhiat hian Rel kawng siamtu ten harsatna tawkin, Hortoki mipui tan harsatna an siam thu Pu Hmingdailova chuan helaia thawktu contractor hnenah a hrilh a. Hun tiam chhunga an siam zo lo anih a an hna a that loh chuan sawrkar tan pawh hmaibalh theihna a nih avangin an hna chu an theih anga thawk turin a chah.

Nikum October thla khan Mizoram Sawrkar in he kawng siamna tur cheng Nuai 100 a lo tihfel tawh thu bialtu MLA chuan sawiin kumin April thla-a zawh tur a ni a mahse, October atanga March thla inkar chhungin hnathawh hmuh tur a awm mumal loh thu leh tunah Fur ruah tui avangin kawng a chhia a tihngaihna a vang tawh hle a ni a ti. PWD hotute hnenah pawh he kawng hi mipui tan leh Rel kawng siamtute tan a pawimawh avangin ngaihthah lo turin a chah bawk.

Kawnpui leh Hortoki inkar kawng awmsa hi NF Railways chuan Mizoram PWD ah Rel Station panna kawng atana hman an dil a. PWD in a phalsak angin Contractor pakhat hnuaiah siam that mek a ni a. NF Railways in an siam tur chin piah lamah Mizoram sawrkar sum hmangin Contractor pakhat in a siam dawn bawk.

Parliamentary Secretary chuan Rel kawng siam mek chungchang zawhna chhangin Railways hotute chuan kal kawng a that chuan an hmanrua mamawh ang phurh luh zung zung theih a ni a. Harsatna an neih loh thu leh Dan leh thupek lamah pawh District thuneituten an vil ngun a, a chhehvel mipui ten an tawiawm tha bawk a, an hna pawh tluang takin an thawk reng niin an sawi.