Mizoram sawrkar hnuaia Department hrang hrang inelna Annual Mizoram Civil Services Sports Meet tum 31-na Ni li awh tur chu vawiin  khan Pu Lalthangpuia Sailo, Comissioner & Secretary, Sports and Youth Services Department chuan a hawng. Opening Ceremony  R. Dengthuama Indoor Stadium, Mualpuia neih a hnuin inkhelh tan nghal  a ni.

Sports Meet Khuallian Pu Lalthangpuia Sailo chuan Sports hi hriselna a ni a, mihring hrilsel nan a pawimawh avangin kum upat thleng pawha thlah loh tur a ni a, hetianga sawrkar hnathawk tana kum tin annual sports buatsaih a ni thei  chu  a lawmawm tak zet zet thu sawi in  a pawimawh ber chu thawhrimna leh tih takzetna a ni a, competion sang zawk a ni emaw, intihlimna satliah pawh nise, engkimah hian theihtawp chhuah hi a tha a, chu chu hlawhtlinna bul a ni tiin Sports meet-a tel zawng zawngte an thehna sang ber khelchhuak turin duhsakna a hlan. 

July 31 atanga August 3, 2018 chhungin neih tur Sports Meet-ah hian inelna chi hrang pasarih - Badminton, Table Tennis, Chess, Carrom, Shooting, Chinese Checker leh Tennis-ahte sawrkar Department hrang hrang an inel leh dawn a, nikuma tel lo Tennis chu kumin hian telh thar a ni a, kuminah hian Players 1400 vel tel tura beisei an ni a, Badminton, Table Tennis, Chess, Carrom, Shooting leh Chinese Checker-te R.Dengthuama Indoor Stadium-ah khelh a ni anga, Tennis erawh Aizawl Tennis Court-ah khelh a ni ang.

Kum 2017, nikum khan Sept. 12 atanga 16 chhung khan R.Dengthuama Indoor Stadium-ah tho inelna neih a ni a, a pumpuiah Home Department (Police) chu pakhatna niin gold 11, silver 8 leh bronze 13 an la a, pahnihna PHE chuan Gold 5, silver 4 leh bronze 3 dawngin pathumna PWD chuan gold 5, silver 1 leh bronze 1 an dawng ve bawk.