Mizoram Civil Services Sports & Cultural Association buatsaih XXVI Inter-Departmental Sports-2013, August ni19 a tan chu vawiin khan Govt. Mizo High School Indoor Stadium-ah Pu K. Lal Nghinglova, Commissioner & Secretary, School Education Department chuan a khar a. Mizoram Police te chu a pumpuiah pakhatna an ni.

Sports kharna inkhawm, Sports & Youth Services Department Director Pu Lalzirmawia Chhangte kaihhruaiah hian Pu Lalnghinglova chuan department hrang hrangte tel theihna kum tina infiamna buatsaih thin hi inunauna leh thawhhona tha an neih theihna tura thil tangkai a ni, a ti. Sorkar department-ah te infiammi, an theih chungchuan vanga lakluh te an awm fo tawh thin a, heng mite hi sports an theih avanga lut an nih angin infiamna lama an talent tipung tur zawnga chhawr tangkai thiam tula a hriat thu Secretary chuan a sawi.

Kuminah hian department hrang 27 leh Bank leh Corporation 6 atangin infiammi 965 an tel a. Badminton-ah mi 306, Table Tennis-ah mi 271, Chess-ah mi 126 leh Carrom-ah mi 262 an tel a ni.