Mizoram Civil Services Sports & Cultural Association (MCSS & CA) bultum, Inter-Departmental Sports 29-na chu vawiin khan R. Dengthuama Indoor Stadium, Mualpuiah neih tan niin, Sorkar hnathawk infiammi 800 vel an tel a. Zirtawpni (26.8.2016) thleng neih a ni ang.

Sports Meet hawnna inkhawm hi vawiin chawhma khan Sports & Youth Services Seceratary Pu HL Rochungnunga, IAS hovin neih a ni a. Thusawiin Sorkar hnathawkten inkaihhruaina dan leh hrai an zawm that a pawimawh thu leh, infiammi tan chuan "sportsman spirit" tha tak neih a thu thu te tarlangin, Inter Departmental Sports chuan inunauna tha leh thawhhona tha siam lehzual se a ti a ni.

Hawnna inkhawm hi Pu Lalrammawia, Addl.Secretary chuan kaihruaiin, General Secretary Pu Rosangliana, Administrative Officer, MSSC chuan Inter-Departmental Sports kalpui anih dan tlangpui report a pe a. Pu C. Lalremsanga, Mizo Olympian awmchhun kaihhruainain thuthiam (Oath taking) neih a ni a, hei hi intihsiakna in a chhunzawm nghal a ni.

Inter-Departmental Sports-ah hian Mizoram Sorkar hnuaia department hrang hrang 50 chuang an tel a. Intihsiakna chi hrang hrang - Badminton, Table Tennis, Chess, Carrom leh Chinese Checker-ah inelna a awm dawn a. He intihsiakna hi Civil Services of India hnuaia inziaklut thlapa, kalphung mumal tak nena kalpui thin a ni.

Inter-Departmental Sports hi kum dangah chuan indoor stadium hrang hrangah neih a ni thin a. Kuminah chuan hmun khata a rualin an nei theih na - R.Dengthuama Indoor Stadium sak zawh a nih tak avangin he hmunah hian inelna hrang hrang hi neih vek a ni ang. Badminton Court 5 bakah Table tennis khelhna tur board 4 hun a ni a, Ground Floor-ah Carrom leh Chess intihsiakna neih a ni bawk.