Inter-Ministerial Central Team, Shri Lokesh Jha, Joint Secretary, Ministry of Home Affairs hova lo kal chuan March atanga April 2010 chhunga Mizorama thlipui leh rial avanga chhiatna tuarte a hmuna tlawhin an enfiah a. Disaster Management & Rehabilitation (DM&R) Director Pu V. Sapchhunga leh DM&R Staff te bakah Horticulture leh I&PR Officer ten an tawiawm a ni.

Inter-Ministerial Team hian nimin khan Durtlang leh Sihphir-aHorticulture Green house leh  huan thlai chhia te enfiahin Durtlang Gardeners' Society leh Mizoram Iskut Growers' Association hruaitute an kawm a, Bukpui leh North Chaltlanga thlipui leh rial avanga chhiatna tuarte kawmin chhiat an tawh dan te a hmunah kalin an en bawk a. Kolasib DC aiawhin Pu C. Khamluaia, S.Dy.M, Kolasib District in Bukpui leh North Chaltlang an tlawhnaah hian a lo tawiawm a ni.

Inter-Ministerial Team hian vawiin khan Aibawk leh Thenzawl-a thlipui vanga chhiatna tuarte an tlawh leh a, Thenzawlah hian Serchhip DC Pu H. Darzika leh District Officer ten lo hmuakin an lo kawm a, chhiatna an tawh dan te an lo hrilhfiah. Serchhip DC leh Staff te hian Fund an hmuh tamtawk loh vanga duh anga tanpuina an pek tam theih loh dan te an lo hriattir a, video clip an thlir ho bakah a hmunah kalin chhiatna tuartute dinhmun an en nghal bawk a ni.

Inter-Ministerial Team hi March atanga April 2010 chhunga Mizorama thlipui leh rial avanga chhiatna tuarte dinhmun Central-a report thehluh bawhzui a lo kal an ni a, Mizorama thlipui leh ruah avanga chhiatna tuarte dinhmun an hmuhdan hi Central sorkar-ah report an pe leh dawn a, naktuk hian Mizoram an chhuahsan dawn a ni.